COVALIMA, POLÍTIKA, SEGURANSA

PNTL Femenina tuir formasaun vizaun ba igualdade jéneru iha Covalima

PNTL Femenina tuir formasaun vizaun ba igualdade jéneru iha Covalima

PNTL Femenina tuir formasaun kona-ba vizaun igualdade jéneru iha Covalima. Imajen Tatoli/Celestina Teles.

COVALIMA, 04 agostu 2022 (TATOLI)–Polísia Nasionál Timor-Leste (PNTL) Femenina hosi munisípiu Bobonaro, Ainaro, Manufahi no Covalima tuir formasaun konteúdu jéneru no vizaun ba igualdade jéneru iha munisípiu Covalima.

“Ita ko’alia igualdade jéneru, ita la separa polísia femenina no mós polísia mane-sira kuaze ami hotu-nia funsaun hanesan. Maibé atu alkansa no mós dezempeña ba iha funsaun polisiál própriu komandante polísia femenina, xefe feminina sempre tenta planu anuál oinsá atu hasa’e kapasidade liuhosi meiu formasaun atu bele sai servidór di’akliu iha future, hanesan esperansa ba instituisaun no povu hakarak polísia ne’ebé profisionál iha atendimentu,” Komandante PNTL Munisípiu Covalima, Superintendente Polisía Basilio de Jesus, hateten ba jornalista sira iha Bairru Costa, kinta ne’e.

Nune’e, nia dehan, Xefe Polísia Femenina sira iha nivél nasionál alkansa nia atividade formasaun ne’e, bazea ba planu anuál ne’ebé aprova hosi Komadante Jerál Polísia Nasionál Timor-Leste (PNTL) kada tinan atu atinje alvu no dezempeñamentu, no hosi ida-ne’e mak bele hetan out-put.

Out-put mak liuhosi formasaun ne’e, ita-nia polísia feto mais kualidade iha nia atendimentu hodi servi ema-ne’ebé hasoru problema. Problema ne’ebé mak akontese iha seksaun Polísia Nasionál Timor-Leste, Unidade Ema Vulneravél (PNTL-VPU) kueze orienta servisu atendimentu ba abuzu seksuál no seluk tan,” nia dehan.

Entaun, iha tempu ne’ebé polísia feminina sira halo atendimentu ba servisu sira-ne’e, ema hakarak atu polísia ida ho kualidade nakonu ho morál, étika, atu koloka sira-nia an sai servidór ne’ebé di’ak hodi hadau ema hotu nia sentimentu.

Ho nune’e, komandante Jerál PNTL aprova programa formasaun jéneru nian ba iha komandu PNTL munisípiu 13, tanba semana liubá hala’o ona iha munisípiu Liquiça, ohin hahú iha Covalima sai sentru hodi konsentra polísia femenina sira hosi Bobonaro, Ainaro, Manufahi no Covalima.

Formasaun ne’e hala’o durante loron rua ne’ebé hahú iha loron-kinta (04/08) ne’e aprezenta matéria konteúdu jéneru no vijaun ba igualdade jéneru ne’ebé aprezenta hosi Gabinete Jéneru PNTL, Teresinha de Sousa, no kapasita mídia aprezenta hosi relasaun públiku.

Iha sesta (05/08) aban, sei aprezenta matéria kapasitasaun utiliza webmail ne’ebé aprezenta hosi departamentu IT PNTL, Dezenvolvimentu Dixiplinár aprezenta hosi Departamentu Justisa PNTL, Jestaun Identifika Fonte no Sosiál iha Komunidade Prevensaun Konflitu iha Komunidade ne’ebé aprezenta hosi departamentu Polísia Komunitária-PNTL.

Jornalista : Celestina Teles

Editór         : Cancio Ximenes

iklan
iklan

Leave a Reply

iklan
error: Content is protected !!