Uma-kain 42 afeta ba dezastre natural iha Covalima seidauk hetan apoiu hosi Governu
COVALIMA 04 agusto 2022 (TATOLI) – Diretór Servisu Munisípal Jestaun Dezastre Naturál Covalima , Quintino da Costa, hateten vítima dezastre naturál iha Munisípiu Covalima hamutuk uma-kain na’in-42 ne´ebé seidauk hetan apoiu materiál uma nian hosi Ezekutivu.
“Hahú hosi janeiru to’o agora ita iha vítima ne’ebé afeta hosi dezastre naturál hamutuk uma-kain 42 ne’ebé karegória uma aat totál no kmaan. Ita submete ona relatóriu ba nasionál nune’e bele hetan apoiu rekoperasaun iha futuru, prosesu sei iha iha nivél nasionál”, Quintino da Costa , hateten ba jornalista sira, iha Bairro-Costa, kinta ne’e.
Nia dehan, vítima ne’ebé seidauk hetan apoiu materiál rekoperasaun uma ne’e ho tipu dezastre naturál hanesan anin sobu uma, ahi-han uma no mós rai halai hosi Postu Administrativu hitu iha Munisípiu Covalima.
Quintáo haktuir, bainhira mak atu hetan apoiu materiál rekoperasaun ne’e seidauk bele fó sai tanba prosesu apoiu materiál sentraliza iha nivél sentrál.
Maske seidauk hetan apoiu rekoperasaun uma, maibé fó ona apoiu emerjénsia hosi servisu munisipál ho servisu delegasaun territóriu hamutuk ho parseiru fó ona apoiu ba vítima sira afetadu ba dezastre natural.
Durante halo atendementu servisu munisipal jestaun risku dezastre naturál hasoru dezafisiu sira hanesan, la iha transporte operasionál adekuadu atu fasilita servisu bele la’o ho di’ak liu.
“Maske hasoru dezafiu, hanesan laiha transporte maibé ida ne’e la´os sai bareira atu hamate servisu ho maibé dezafiu hanesan parte motiva ida, ita hanesan timor-oan iha situasaun sa ida de’it prontu atu hala’o servisu”, revela.
Rekorda katak udan bo’ot ne’ebé akontese iha loron (30/6) tinan 2022 hamosu inundasaun iha Munisípiu Covalima hanesan afetadu ba dadur sira iha prizaun suai, sentru saúde suai no mós afetadu ba komunidade sira hodi husik sira-nia hela fatin hodi evakua vítima sira ba iha sentru evakusaun eskola sekundáriu jerál públiku suai.
Bazea ba levantamentu dadus ekipa Komisaun Risku Dezastre Naturál udan-boot akontese iha fulan juñu tinan 2022, populasaun hamutuk 1,126 mak afetadu ba dezastre naturál no hosi númeru ne’e feto na’in-521 mane na’in-605 ho total xefi família 376.
Jornalista : Celestina Teles
Editór : Zezito Silva
