HEADLINE, SEGURANSA

PNTL Dili kontinua detein suspeitu na’in-21 ba kazu konfrontu iha Becora

DILI, 05 agostu 2022 (TATOLI)- Komandante Polísia Nasionál Timor-Leste (PNTL), Munsípiu Dili, Superintendente Xefe Henrique da Costa, hateten hafoin seksaun investigasaun kriminál halo identifikasaun ba suspeitu na’in-31, konsege liberta na’in-10 tanba idade minioridade no kontinua detein suspeitu na’in-21 tanba iha indísiu forte envolve konfrontu iha suku Becora, munisípiu Dili.

Iha tuku 11:00 dadeer, kinta (4/08), akontese konfrontu ka tuda malu entre estudante hosi Eskola Sekundária 12 Novembru no Estudante Sekundária 5 de Maio, rezulta karreta patrolla Eskudra Cristo-Rei rahun no membru PNTL eskuadra Cristo-Rei ida hetan kanek.

Hafoin, PNTL Eskuadra Cristo-Rei hamutuk ho ekipa konjunta halo intervensaun konsege detein suspeitu nain-31.

“Horisehik, ita detein estudante sira hamutuk 31, maibé hafoin ita-nia seksaun investigasaun kriminál halo tiha prosesu identifikasaun ba sira iha estudante nain-21 mak sai suspeitu ona no no kontinua detein iha sela detensaun Komandu Dili. Ba estudante na’in-10 seluk mak ita haruka fila uma tanba idade sei minioridade,” Komandante PNTL ne’e informa liuhosi konferénsia imprensa ne’ebé hala’o iha Komandu PNTL Dili-Caicoli, sesta ne’e.

Hosi suspeitu na’in-21 ne’ebé iha sela detensaun Komandu munisípiu Dili, iha suspeitu ida ho inisiál PL hosi estudante eskola Sekundária 12 Novembru nian mak konsidera hanesan autór prinsipál tanba nia mak tuda Xefe Investigasaun Eskuadra Cristo-Rei to’o hetan kanek iha parte-ain.

“Suspeitu ne’e ita konsidera hanesan suspeitu prinsipál tanba sai hanesan autór provokatór no nia mak tuda hasoru Xefe Investigadór Eskuadra Cristo-Rei. Maske suspeitu ne’e deklara ona katak la’ós nia mak halo,” Superintendente Xefe ne’e akresenta.

Haree ba suspeitu nain-21 nia hahalok, PNTL submete ona rezultadu investigasaun ba Ministériu Públiku ho Númeru Úniku Kriminál (NUC) 0132 /2022 DIBSR ho tipu krime obsesaun ba autoridade ne’ebé previstu iha artigu 243 no krime danu agravadu iha artigu 259 hosi Kódigu Penál Timor-Leste.

Nune’e, Komandante PNTL Munisípiu Dili husu ba inan-aman atu fó hanoin ne’ebé di’ak ba oan sira atu eskola tenke buka atu aprende no estuda labele envolve iha konflitu.

“Tanba eskola ne’e fatin aprende siénsia, la’os fatin atu halo problema, kuandu nune’e PNTL sei atua tuir regra,” nia sujere.

Notísia relevante:  Konfrontu iha Becora, PNTL detein suspeitu nain-31

Jornalista: Natalino Costa

Editór      : Florencio Miranda Ximenes

iklan
iklan

Leave a Reply

iklan
error: Content is protected !!