HEADLINE, MUNISÍPIU, VIQUEQUE

Postu Uatucarbau implementa programa alfabetu ba abitante iha suku tolu

Postu Uatucarbau implementa programa alfabetu ba abitante iha suku tolu

Inan-aman sira partisipa iha programa alfabetu, iha sede suku Irabin de Baixo, sesta (05/08). Imajen Tatoli/Vitorino Lopes da Costa

VIQUEQUE, 05 agostu 2022 (TATOLI)—Postu Uatucarbau, munisípiu Viqueque daudaun ne’e hahú implementa projetu pilotu programa alfabetu ba abitante sira iha suku tolu hanesan Irabin de Baixo, Irabin de Cima no Uani-uma.

“Ohin, ami hahú implementa projetu pilotu programa alfabetu iha suku tolu postu Uatucarbau. Ita haree inan-aman barak maka seidauk hatene lee no hakerek, tanba ne’e Governu implementa programa ne’e atu hanorin inan-aman sira iha suku,” Administradór postu administrativu Uatucarbau, Alfredo dos Santos, informa, iha sede suku Irabin de Baixo, sesta ne’e.

Notísia relevante: Embaixadór Eusébio komprometidu komunika Governu kubanu hodi reativa programa alfabetizasaun

Programa ne’e realiza hosi inisiativa Ministériu Edukasaun Juventude no Desportu (MEJD), serbisu hamutuk ho Ministériu Administrasaun Estatál (MAE), nune’e Governu destaka  ona profesór alfabetu rua hodi hanorin.

“Ha’u rasik maka sei halo kontrolu durante implementasaun programa alfabetu ne’e, nune’e ha’u husu xefe suku no xefe aldeia sira orienta inan-aman sira hodi partisipa iha programa ne’e iha sede suku,” nia akresenta.

Iha fatin hanesan, Koodenadór alfabetu iha postu Uatucarbau, João Xavier, hateten, Governu kria programa pilotu ne’e hodi hanorin inan-aman sira ho di’ak.

“Ha’u sei esforsu-an nafatin atu inan-aman sira tenke eskola, maski la hatene hakerek maibé esforsu-an hodi apreende atu sira bele hatene lee no hakerek. Tanba ne’e, ami sei buka meiu oinsá bele motiva inan-aman sira mai apreende,” nia tenik.

Tuir alvu, partisipante 20 mak sei partisipa iha programa alfabetu iha kada suku, ne’ebé programa ne’e kada semana ida hanorin dala-rua ho durasaun fulan-tolu.

Nune’e mós, Reprezentante estudante alfabetu, Rosa Fernandes, apresia ho inisiativa tanba liuhosi programa ne’e bele fó oportunidade ba inan-aman sira bele apreende.

“Ami sente kontente tanba Governu bele kria program ida-ne’e ba ami hodi apreende, tanba durante ne’e ami la hatene lee no hakerek, maibé hosi oportunidade sira-ne’e ami bele apreende,” nia agradese.

Jornalista   : Vitorino Lopes da Costa

Editora        : Julia Chatarina

iklan
iklan

Leave a Reply

iklan
error: Content is protected !!