Komunidade preokupa kondisaun estrada liga ba suku Bahatata
VIQUEQUE, 06 agustu 2022 (TATOLI)-Reprezentante xefe suku Bahatata, José da Silva, hateten, komunidade suku Bahatata ninia preokupasaun durante ne’e maka kondisaun Estrada ne’ebé liga mai suku aat sai difikuldade komunidade sira lori produtu ba merkadu.
“Durante ne’e ami-nia preokupasaun maka estrada ne’ebé liga hosi postu Baguia no hosi postu Uatucarbau mai suku Bahatata. Dalan ne’e difikulta komunidade sira atu lori sira-nia produtu ba merkadu tanba kondisaun estrada aat,” José da Silva, hateten ba jornalista sira, iha sede suku Bahatata, sesta nee.
José hatutan, dalan hosi postu Uatucarbau ba to’o suku Bahatata kondisaun ladi’ak no difikulta movimentasaun transporte públiku.
“Ohin loron negosiante hosi Baguia no Uatulari ne’ebé mai fa’an sasán iha suku Bahatata, agora la mai tanba kondisaun estrada ladi’ak, sira la mai fa’an sasán iha-ne’e hodi komunidade sira sosa. Nune’e foos kilograma 25 negosiante sira hasa’e presu ba $25 kada saka,” nia hateten.
Iha fatin hanesan, komunidade hosi aldeia Uai-mare, suku Bahatata, Odete Pinto, informa tempu udan komunidade atu asesu ba merkadu la di’ak tanba kondisaun Estrada aat tebes.
“Ami hakarak ba merkadu Uatucarbau no ba Baguia mós ladi’ak tanba kondisaun estrada ida-ne’e. Kuandu ami hakarak fa’an produtu tenke tutur ami-nia produtu to’o postu Baguia maka foin sa’e karreta. Ami husu governu tau atensaun ba ami-nia estrada, atu ami bele lori produtu ba merkadu,” nia fó hanoin ba Governu.
Nia dehan, agrikultór hetan osan liuhosi produtu sira-ne’ebé kuda, maibé kondisaun Estrada mak sai problema boot.
“Foos iha-ne’e folin karun no kondisaun Estrada aat nune’e negosiante sira ne’ebé mai fa’an foos hanesan kilograma 25 ho presu maka $25, maske folin aas komunidade sira pasiénsia sosa hodi haan,” nia akresenta.
Iha biban ne’e, responsável postu saúde Bahatata, Roberto Pereira Gusmão, hateten, kondisaun Estrada ne’ebé liga ba postu saúde Bahatata difikulta pesoal saúde sira, atu lori ai-moruk ba postu saúde no halo transferénsia moras ba sentru saúde.
Iha fatin hanesan, adiministradór postu Uatucarbau, Alfredo dos Santos, informa, kondisaun estrada ne’ebé liga ba suku Bahatata kondisaun aat kuaze tempu okupasaun to’o ohin loron.
“Ita bele hateten suku Bahatata iha munisípiu Viqeueque sai izoladu tanba dalan hosi suku Bahatata ba ami-nia postu kuaze kilómetru 30-resin, ema la’o de’it mós ladi’ak,” nia subliña.
Nia hato’o ona pedidu MOP no Institutu Jestaun Ekipamentu, Institutu Públiku (IJE,I.P), maibé to’o agora seidauk fó resposta.
“Ohin mós ha’u prepara tán proposta ba IGE. Ha’u nu’udar governu nian liman ain rohan haree preokupasaun sira-ne’e sente triste tebes,” nia afirma.
Suku Bahatata iha uma-kain 201 no totál abitante 922. Abitante hirak-ne’e mai hosi aldeia haat komposta hosi aldeia Builakurae totál abitante hamutuk na’in 202.
Nune’e mós abitante aldeia Uai-Mare totál hamutuk na’in-337, abitante hosi aldeia Tata Dere totál hamutuk na’in 270 no aldeia Nelu-Uai totál abitan hamutuk na’in-112.
Jornalista : Vitorino Lopes da Costa
Editóra : Evaristo Soares Martins
