Postu saúde Bahatata presiza ai-moruk Miconazol
VIQUEQUE, 06 agustu 2022 (TATOLI)-Postu saúde ne’ebé lokaliza iha suku Bahatata, postu administrativu Uatucarbau, munisípiu Viqueque, presiza ai-moruk miconazol hodi fó tratamentu ba komunidade sira iha suku refere.
“Daudaun ne’e ami laiha ai-moruk miconazol ba moras kulit nian. Stock ai-moruk ne’ebé maka daudaun ne’e postu saúde iha maka hanesan paracetamol, antibiótiku, potri no ai-moruk báziku sira seluk,” Responsável postu saúde Roberto Pereira Gusmão, hateten ba jornalista sira, iha postu saúde Bahatata, sesta ne’e.
Nia dehan, daudaun ne’e kazu moras kulit rejista iha postu saúde Bahatata iha, maibé dala barak komunidade sira mai konsulta ai-moruk maka laiha.
“Ami presiza tebes ai-moruk kulit katar ninian hodi fahe ba ita-nia komunidade sira hodi kose ba isin sira-ne’ebé katar,” nia relata.
Kona-ba ai-moruk miconazol ne’e, nia hato’o ona pedidu ba sentru saúde Uatucarbau, maibé iha sentru saúde postu Uatucarbaun mós stock ai-moruk laiha.
Alende ne’e, iha postu saúde Bahatata fulan-Jullu mós rejista kazu moras Insfeksaun Respiratóriula Agudu ho totál kazu hamutuk 30 no rejista mós moras sira seluk hanesan katar no tee-been.
Tuir dadus pesoál saúde ne’ebé destaka iha postu saúde Bahatata hamutuk na’in-haat, komposta hosi doutor na’in-ida, enfermeiru na’in-ida, saúde públika na’in-ida no parteira na’in-ida.
Jornalista: Vitorino Lopes da Costa
Editóra : Evaristo Soares Martins
