HEADLINE, MUNISÍPIU, SAÚDE, VIQUEQUE

Sentru saúde Uatulari lakon profisionál saúde ida

Sentru saúde Uatulari lakon profisionál saúde ida

VIQUEQUE, 06 agustu 2022 (TATOLI)-Diretór Servisu Saúde Munisípiu Viqueque, Francisco de Carvalho, hateten, sentru saúde postu Uatulari, munisípiu Viqueque lakon tán ninia profisionál di’ak ida tanba hetan moras.

“Ami lakon tán ami-nia profisionál di’ak ida-ne’ebé durante ne’e serbí abitante sira iha postu Uatulari. Nia nu’udar profisionál saúde hosi tempu okupasaun Indonézia nia tempu to’o agora. Ami sente triste tanba lakon  profisionál ida,” Francisco de Carvalho, hateten ba jornalista sira, iha sentru saúde Uatulari, sábadu ne’e.

Francisco hatutan, liuhosi Ministériu Saúde hato’o sentida kondolénsia kle’an ba família matebian, hodi kontinua fuan boot simu realidade ne’ebé akontese.

“Ha’u lori Ministériu Saúde nian naran hato’o sentidu kondolénsia kle’an ba família matebian sira, maske lakon ita-nia maluk di’ak maibé família sira simu realidade,” nia hato’o.

Matebian Moises Ximenes do Rosário, moris iha loron 10  fulan-juñu tinan 1973.

Matebian hahúserbisu iha tinan 1998, durante ne’e matebian nu’udar enfermeiru serbisu  sentru saúde postu Uatulari to’o nia husik mundu.

Matebian hahú sofre moras iha tinan 2019, nune’e família lori ba halo tratamentu iha Hospital Nasionál Guido Valadares (HNGV), maibé lakonsege salva iha loron 3 fulan-agostu 2022.

Matebian husik ninia oan hamutuk na’in-haat, komposta hosi feto na’in-rua no mane na’in-rua, ne’ebé dadaun ne’e sei kontinua estudu.

Iha fatin hanesan, família matebian, Lourenço de Jesus, sente triste bainhira lakon ninia oan mane ida-ne’ebé durante ne’e serbisu nu’udar profisionál saúde iha sentru saúde Uatulari.

“Ami sente triste tebes tanba lakon ami-nia oan di’ak ida, ne’ebé durante ne’e serbí mós povu Uatulari. Maibé, ohin ami tenke husik nia, ho ida-ne’e ami sente triste lakon ona ami-nia oan mane ne’ebé laran di’ak,” Nia hato’o.

Nune’e ohin haloot ona matebian iha semitériu públiku Kaidilabu, suku Matahoi, ne’ebé akompaña matebian hosi família matebian no profisionál saúde sira iha postu adiministrativu Uatulari.

Jornalista: Vitorino Lopes da Costa

Editóra    : Evaristo Soares Martins

iklan
iklan

Leave a Reply

iklan
error: Content is protected !!