DILI, HEADLINE, NASIONÁL, SAÚDE

Susu-been inan proteje labarik sira-nia imunidade

Susu-been inan proteje labarik sira-nia imunidade

DILI, 06 agostu 2022 (TATOLI)—Ministra Saúde Odete Maria Freitas Belo, hateten, susu-been inan nian mak  proteje labarik sira-nia imunidade hosi kualkér moras.

“Ita  ko’alia kona-ba breastfeeding,  ita ko’alia mós kona-ba labarik foin moris to’o fulan-neen atu fó de’it susu-been inan nian atu proteje sira-nia imunidade hodi labele hetan moras,” Ministra Saúde Odete Maria Freitas Belo, hateten asuntu ne’e bainhira selebra semana mundiál susu-been inan iha BJ Habibie, Bidau Santana, sábadu ne’e.

Hosi loron 01 to’o loron 07 fulan agostu loron ne’e susu-been inan nian entaun Ministériu Saúde hamutuk ho parseiru sira hanesan Organizasun Mundiál Saúde, UNICEF no parseiru sira seluk ko’alia kona-ba breastfeeding iha fulan ida tomak tanba loron ne’e importante tebes ba inan sira fó susu-been ba bebé sira.

“Bebé  sira barak mak hetan moras diarea iha Hospital Nasionál Guido Valadares  (HNGV) no sentru  saúde sira tanba inan sira fó susu-been formula ne’ebé mak  la preparadu ho di’ak entaun ida-ne’e sai  problema ba bebé,” nia informa.

Nia esplika, bainhira fó susu-been inan nian ba labarik to’o tinan rua ajuda tebes fó espasu ba inan sira atu hetan oan tuir mai.

“Ita ko’alia kona-ba nutrisaun bainhira ita fó  atensaun ba labarik sira foin moris, fó kedas susu-been inan nian iha tempu ne’ebá too  fulan-neen ka tinan rua, signifika ita iha dalan atubele redús má-nutrisaun iha ita-nia rain,” nia subliña.

Representante Organizasaun Mundiál Saúde iha Timor Leste, Arvind Mathur, hateten, susu-been inan nian importante tebes ba labarik sira foin moris to’o fulan-neen no kontinua fó susu to’o tinan rua hodi hadi’a sira-nia nutrisaun ne’ebé  di’ak ba futuru.

Alende iha atividade marsa saudável  ne’e la’o-ain husi Igreja Motael to’o BJ Habibie, Bidau Santana hodi selebra semana mundiál susu-been inan ne’ebé partisipa husi Ministériu Saúde, Organizasaun Mundiál Saúde, UNICEF, UNFPA no entidade sira seluk.

Jornalista : Felicidade Ximenes

Editór: Evaristo Soares Martins

iklan
iklan

Leave a Reply

iklan
error: Content is protected !!