AMRT rekolla istória luta iha Vemasse
BAUCAU, 08 agostu 2022 (TATOLI) – Arkivu Muzeu no Rezisténsia Timorense (AMRT) segunda ne’e, hahú abertura rekolla istória luta veteranu sira iha postu administrativu Vemasse, munisípiu Baucau.
Prezidente Komisaun Organizadora Rekolla Dadus AMRT, Alvaro de Vasconselhos, hateten prezensa AMRT iha Vemase sei realiza atividade hanesan rekolla dokumentus rezisténsia, intervista orál, semináriu no espozisaun itenerante.
Abertura ba atividade hahú ho semináriu relasiona ho komemorasaun loron-20 agostu 1975 ho objetivu habelar no haklaken memória rezisténsia ne’ebé lori sofrementu inklui rezulta timor-oan barak mak lakon vida.
“Ami hosi ARMT mai haklaken no fahe ita hotu-nia istória rezistensia hodi komemora loron-20 agostu tinan 1975,” Alvaro de Vasconselhos hateten iha postu Vemase, segunda ne’e.
Nune’e mós atu jerasaun foin sa’e sira komprende kona-ba istória reziténsia nune’e kuda domin no saudade ba eroi sira-ne’ebé organiza-aan halo funu, fakar-raan no lakon sira-nia vida hodi hetan independénsia iha loron 30 agostu tinan-1999.
Sekretáriu Jerál Konsellu Munisipál Kombatente Libertasaun Nasionál (CMCLN, sigla portugés) Baucau, Manuel ‘Alari’ da Costa Soares, agradese ba AMRT tanba rekolla ona istória luta hanesan dokumentu funu ne’ebé inportante atu oan no bee-oan sira asesu no hatene kona-ba aman eroi sira-nia luta.
“Ita-nia oan no bee-oan sira barak mak seidauk hatene kona-ba istória, tanba ne’e mai ita hotu kontribui no koopera intrega dokumentu nune’e AMRT halo konservasau,” Alari hateten.
Atividade refere tuir planu sei realiza durante loron-14, hahú segunda ne’e no sei determina iha loron-21 agostu, ne’ebé tuir dadus estimasaun sei intervista tótal veteranu na’in-150 hosi tótal na’in-353.
Jornalista : Natalino Belo
Editór : Evaristo Soares Martins
