COVALIMA, 08 agostu 2022 (TATOLI)–Diretór Eskola Sekundária Jerál Públiku (ESGP, sigla portugés) Suai, Francelino Freitas Carvalho, informa parte eskola la autioriza estudante balun ne’ebé kartaun kinur (kartaun vasina) laiha no falta barak ne’e la tuir ezame periódu daruak ne’ebe realiza iha segunda (08/08) ne’e.
Eskola foti desizaun ba estudante sira-ne’ebé la iha kartaun kinur la tuir ezame bazea karta sikular hosi Administradór liuhosi servisu edukasuan munisípiu Covalima katak estudante laiha kartaun kinur labele tuir ezame
“Bazea ba sirkular refere molok realiza ezame, eskola nafatin esforsu hodi fó hanoin ba estudante-sira hakbesik ba sentru saúde bele vasina maibé ohin ami haruka estudante fila la’ós sira laiha direitu ba ezame. Maibé nafatin fó oportunidade ba sira atu tuir ezame,” Diretór Eskola Sekundária Jerál Públiku Suai, Francelino Freitas Carvalho hateten, ba jornalista sira iha eskola sekundáriu, segunda ne’e.
Ohin, nia dehan, profesór sira identifika estudante désimu segundu ano balun iha turnu dadeer nian, kuaze estudante na’in 32 mak seidauk simu vasina, estudante desimu primeiru ano kuaze partisipa, estudante desimu ano liuhosi identifikasaun estudante na’in-haat (4) hosi númeru ne’e estudante na’in-ida dieisiénsia no balun moras konplikadu.
Aleinde eskola halo pasa revista kartaun kinur, eskola mós la autoriza estudante sira-ne’ebé durante ne’e falta, ne’ebé profesór sira identifika estudante na’in-20 resin, nune’e eskola sei bolu estudante sira-nia inan-aman no profesór turma.
Hafoin bolu inan-aman sei iha posibilidade rua tanba haree estudante sira-nia falta ne’e, no se falta tanba ho razaun moras hatudu ho prova komprovativu ne’e eskola sei tolera,
Ho nune’e, hanesan diretor eskola sei kolabora ho inan-aman oinsá bele hatene estudante sira falta sei bolu profesór dixiplina no profesór turma sira, tanba eskola realiza ezame bazea ba kalendáriu hosi ministériu edukasaun katak ezame priódu daruak realiza hahú 08 to’o 13 agustu 2022.
Bazea ba dadus, estudante hosi eskola sekundáriu Jerál Públiku Suai hamutuk na’in-2,315 no hosi númeru ne’e kompostu hosi mane hamutuk 1073 no feto hamutuk 1242.
Karta sirkulár hosi administradór ne’ebé Agência Tatoli asesu katak Administradór Munisípiu Covalima, Francisco de Andrade, fó sai karta sirkulár ho númeru referénsia 381/SME-AMC/VII/2022 liuhosi Diretór servisu edukasaun munisípiu Covalima, iha loron 18 jullu 2022 orientasaun kona-ba vasina hodi kombate COVID-19 ba estudante sira.
Esforsu hodi kombate COVID-19 iha teritóriu Timor-Leste hahú kedas iha 2020 ho atividade oioin inklui atividade vasina ba adultu sira no labarik ka joven idade eskolár hosi tinan 12 to’o 17. Governu mantein esforsu ida-ne’e to’o agora hodi bele alkansa objetivu ne’ebé sai hanesan kritériu ida ba nasaun ida livre ona hosi COVID-19.
Nune’e, konsidera orientasaun verbál hosi Señór Administradór Munisípiu Covalima, Servisu Munisipál Edukasaun hatun orientasaun ba señór Diretór eskola sira atu kontinua halo esforsu hanesan hodi kolabora ho inan-aman no própriu estudante hodi simu vasina primeira, segunda no terseira faze.
Estudante sira obrigatóriamente tenke simu vasina tuir regra no protokolu saúde mundiál nian no estudante ne’ebé la kumpre sei aplika sansaun sira hanesan ba estudante ne’ebé laiha kartaun kinur tanba la kolobora ho profisionál saúde sira sei la autoriza partisipa iha ezame pasajen no ezame nasionál.
Ba sira ne’ebé kartaun kinur lakon sei hare iha sistema saúde nian no sirkulár ne’e válidu to’o tempu ne’ebé estudante hotu simu vasina iha nível munisipál.
Jornalista : Celestina Teles
Editór : Cancio Ximenes
