EDUKASAUN, HEADLINE

Estudante 100 resin iha Eskola ESJ 04 setembru sei hetan transferénsia

Estudante 100 resin iha Eskola ESJ 04 setembru sei hetan transferénsia

Estudante Eskola ESJ 04 setembru UNAMET, Dili. Imajen TATOLI/António Gonçalves

DILI, 08 agostu 2022 (TATOLI)–Estudante Ensinu Sekundáriu Jerál (ESJ) 04 setembru UNAMET, Balide, hamutuk 100 resin ne’ebé eskola identifika ona, hafoin ezame segundu períodu ramata sei hetan transferénsia ba eskola seluk.

Diretór Eskola ESJ 04 setembru UNAMET, Sérgio de Jesus, relata, estudante hirak ne’e sei hetan karta xamada tanba nunka kumpre regra eskola no durante ne’e abandona sala aula.

“Sira hein de’it to’o tempu ezame mak foin tama eskola. Ita identifika sira bazeia ba lista prezensa kada loron, ita fó ona karta xamada hodi bolu sira-nia inan-aman maibé inan-aman sira de’it mós nunka mosu to’o ohin loron,” Diretór eskola informa iha ninia knaar fatin, Balide, segunda ne’e.

Notísia relevante: MEJD sei orienta ekipa tékniku halo levantamentu ba ESJ 04 setembru UNAMET

Nune’e, eskola sei fó tempu ba sira partisipa ezame períodu daruak to’o ramata, hafoin sei hetan karta transferénsia hodi ba buka fali eskola seluk.

“Eskola labele atende estudante ida ho modelu hanesan ne’e, ohin loron eskola hotu hakarak esforsu atu hadi’a kualidade, maibé kuandu estudante ida maka kontinua ho hahalok hanesan ne’e signifika profesór sira maka la susesu. Ami hakarak hatudu ami-nia an nu’udar profesór no edukadór profisionál no kualidade. Tanba ne’e, hakarak ka lakohi ami nafatin bazeia ba regulamentu ne’ebé iha, estudante ne’ebé la kumpre regra ami sei fó sansaun,” nia akresenta.

Tuir Diretór, hanesan edukadór labele lakon tempu demais ba estudante sira ne’ebé laiha vontade atu apreende tanba eskola tenke foku ba estudante ne’ebé iha interese hakarak estuda no eskola. Tanba estudante sira maka sei foti eskola ninia identidade no sei hasa’e kualidade ensinu.

Iha sorin seluk, tinan ne’e eskola públiku ne’e kumpre despaixu ministeriál nian, ne’ebé limita ona simu estudante hosi munisípiu sira.

“Espera katak tinan oin kontinua limita tan estudante sira. Eskola 04 setembru sei bele kontrola di’ak liután estudante sira tanba estudante iha eskola ne’e mesak hosi Dili de’it,” nia tenik.

Jornalista   : Tomé Amado   

Editora        : Julia Chatarina

iklan
iklan

Leave a Reply

iklan
error: Content is protected !!