EDUKASAUN, HEADLINE, MUNISÍPIU, VIQUEQUE

Estudante Viqueque na’in-26.826 partisipa iha ezame períodu daruak ohin

Estudante Viqueque na’in-26.826 partisipa iha ezame períodu daruak ohin

Estudante sira iha Viqueque halimar iha resintu eskola molok partisipa iha ezame períodu daruak, segunda (08/08). Imajen Tatoli/Vitorino Lopes da Costa

VIQUEQUE, 08 agostu 2022 (TATOLI)–Diretór Servisu Edukasuan Munisípiu Viqueque, Emídio Amaral, informa, estudante hosi ensinu báziku, sekundáriu jerál no  tékniku vokasionál hamutuk na’in-26.826 partisipa ezame períodu daruak ohin.

“Preparasaun ba pontu ezame daruak ne’e kada eskola ida-idak maka prapara. Tanba kada tinan pontu ezame  ba ezame primeiru no segundu períodu ne’e profesór kada eskola sira maka prepara rasik maka fó ba ita-nia estudante sira,” Diretór informa ba Agência Tatoli, iha ninia knaar fatin, Beloi, segunda ne’e.

Notísia relevante: Edukasaun Viqueque orienta eskola sira prepara matéria ba ezame daruak

Ezame daruak ne’e sei realiza durante loron-lima, hahú segunda ne’e no sei ramata iha sesta semana ne’e, nune’e eskola públika sira iha munisípiu Viqueque hotu realiza ezame. Enkuantu eskola privadu katólika antes ne’e hahú uluk ona ezame períodu daruak maibé eskola públika ohin maka foin hahú ezame tuir kurríkulu edukasaun nian.

“Eskola Ensinu Báziku Sentál (EBC, sigla portugés) iha munisípiu Viqueque ita iha 21, sekundáriu jerál neen no tékniku vokasionál hamutuk rua. Iha ezame daruak ne’e ha’u haree ezame la’o di’ak, laiha eskola públika ida maka ohin la realiza ezame. Eskola sekundáriu privadu iha munisípiu Viqueque hamutuk tolu,” nia akresenta.

Estudante sira iha munisípiu Viqueque ne’ebé partisipa iha ezame períodu daruak hosi ensinu  pre-eskolár hamutuk 1.954 kompostu hosi mane 926 no feto 1.028, estudante hosi ensinu báziku hamutuk 20.061 kompostu hosi mane 10.376 no feto 9.685.

Ensinu sekundáriu hamutuk 4.548 kompostu hosi mane 2.128 no feto 2.420 no estudante hosi ensinu tékniku vokasionál 263 kompostu hosi feto 103 no mane 160.

Jornalista   : Vitorino Lopes da Costa

Editora        : Julia Chatarina

iklan
iklan

Leave a Reply

iklan
error: Content is protected !!