DILI

Governu aloka rihun $100 komemora loron Konsulta Populár ba dala-XXIII

Governu aloka rihun $100 komemora loron Konsulta Populár ba dala-XXIII

Konsulta Populár. Imajen/Espesiál.

DILI, 08 agostu 2022 (TATOLI)—Koordenadór Komisaun Loron Konsulta Populár, Elizeu Ângelo da Costa Soares, informa Governu aloka osan kuaze rihun $100 hodi komekora loron Konsulta Populár ba dala-XXIII (30 agostu 1993- agostu 2022) ne’e atu anima povu Timor-Leste.

Notísia Relevante: Konsulta Populár 30 agostu nu’udar loron vitória polítika Timor-Leste

Nia hateten, Governu liuhodi Ministériu Administrasaun Estatál (MAE) deside hili tema ba kemomorasaun loron Konsulta Popular ba dala-XXIII ne’e “Ho espiritu loron konsulta populár 30 agostu 1999 mai ita hametin pás no estabilidade ba dezenvolvimentu iha ita-nia rai Timor Leste” ne’e, tanba loron 30 agostu nu’udar loron istóriku ne’ebé determina povu Timor-Leste nia destinu iha 1999, nune’e esperitu ne’e da’et nafatin to’o ohin loron.

“Osan ne’ebé mak prevee ba ativdade konsulta populár kuaze rihun $100 ne’e hanesan kalkulu ida maibé bele to’o ne’ebá no bele mós la to’o ne’ebá. Osan hirak-ne’e atu aloka ba atividade desportiva iha loron konsulta popular hodi anima povu,” nia dehan ba Agência Tatoli, iha nia knar fatin Colmera, Dili, segunda ne’e.

Atividade ne’ebé maka komisaun organizadora halo hosi loron 05-30 agostu ne’e mak hanesan desportu komunitária ne’ebé mak hala’o iha suku hotu-hotu, ezemplu hanesan iha Dili mak suku sira halo kompetisaun desportiva sira mak hanesan futeból, volliból ne’ebé sei realiza iha nivel suku, postu administrativu no sei kompleta iha nivel munisipál.

“Ita mós realiza atividade sira-ne’ebé mak hanesan semináriu hodi halo reflesaun kona-ba selebrasaun loron konsulta popular nian, iha mós feira, no mós konsertu muzikál ba loron 30 agostu nian no sei halo mós marsa saudavél,” nia esplika.

Kona-ba marsa saudável ne’e, nia dehan, sei hahú iha rotunda Prezidente Nicolau Lobato, Comoro, Dili, to’o mai to’o iha jardin 05 maiu Colmera, no sei taka ho konsertu muzikál iha jardin refere.

“Iha marsa saudável ne’e mós ita sei konvida ita-nia Prezidente Repúblika atu bele partisipa mós iha marsa saudavél ida-ne’e,” nia dehan.

Tuir nia, Governu selebra loron Konsulta Populár ho intensaun ida atu esperitu timoroan hamutuk hodi termina Timor-leste niadestinu Ukun Rasik An iha 1999 ne’e, iha ámbitu ukun rasik an moris nafatin nune’e bele kria dame dame no estabilidade, no dezenvolviementu ba rai ida-ne’e di’ak liután.

Tuir dokumentu istóriku ne’ebé Agência Tatoli sira hosi relatóriu Comissão de Acolhimento, Verdade e Reconciliação de Timor Leste (CAVR-TL) ho titulu “Chega!” ne’e haktuir katak, iha loron 30 agostu 1999 nu’udar lorom memória istóriku ida ba Timor-Leste, tanba maske hasoru intimidasaun no violasaun oioin, iha loron ida-ne’e povu iha territóriu Timor-Leste, Indonézia, Austrália no Portugál sai hosi uma nakonu ho esperansa hodi fó sira0nia votu ba opsaun atu hamutuk ho Indonésia ka haketak an hosi Indonézia.

Sentru votasaun ba Konsulta Populár (30 agostu 1999) hamutuk 200 mak estabelese iha territótiu Timor laran tomak. Totál populasaun ne’ebé rejistu atu vota hamutuk 451,792 no hosi totál populasaun ne’e, 98,5% ba mak vota iha sentru votasaun.

Jornalista : Osória Marques

Editór      : Cancio Ximenes

iklan
iklan

Leave a Reply

iklan
error: Content is protected !!