DILI, HEADLINE, POLÍTIKA

Horta kompromete sei intensifika relasaun bilaterál ho Korea Súl

Horta kompromete sei intensifika relasaun bilaterál ho Korea Súl

Prezidente Repúblika, José Ramos Horta, ko’alia ho embaiador Korea Súl iha Timor-Leste hafoin partisipa iha atribuisaun medalla méritu ba militár Korea na’in-lima ne’ebé hola parte iha forsa manutensaun pás ONU nian iha Timor-Leste, ne’ebé mate iha RAEOA, segunda (08 agostu 2023. Imajen Tatoli/António Daciparu.

DILI, 08 agostu 2022 (TATOLI)—Prezidente Repúblika (PR), José Ramos Horta, kompromete durante nia mandatu sei intensifika relasaun bilaterál ho Estadu Repúblika Korea Súl.

“Ha’u espera katak durante ha’u-nia mandatu no liuhosi parseiru ho Governu Timor-Leste no Korea ita sei intensifika relasaun bilaterál iha nível hotu ne’ebé mak posivel,” Prezidente Repúblika, José Ramos Horta, hateten iha diskursu iha serimónia atribui medalla méritu ba militár Kore na’in-lima ne’ebé mate iha RAEOA-Timor-Leste, iha Palásiu Prezidensiál Nicolau Lobato, Bairru Pite, segunda ne’e.

Xefe Estadu ne’e hateten, povu Korea Súl no Timor-Leste (TL) iha esperiénsia umana ne’ebé mak hanesan no Repúblika Korea Súl sofre kolonizasaun, funu no ki’ak, no TL sei nafatin nu’udar nasaun ki’ak liu iha mundu, maibé TL mós halo ona progresu boot tebes iha tinan 20 liu ba.

“Korea Súl nu’udar nasaun ida-ne’ebé mak ki’ak liu iha mundu iha tempu hirak liu ba maibé ohin loron, Korea Súl nu’udar nasaun ida ho ekonómia vibrante no demokrásia vibrante iha mundu,” nia hateten.

PR Horta espera katak iha 2023, TL sei sai nu’udar membru ASEAN no Repúblika Korea sempre hamriik iha TL nia sorin apoiu aplikasaun TL nian ba membru ASEAN.

Alleinde ASEAN, Ramos Horta espera katak TL no Korea sei hadi’a liután relasaun entre nasaun rua ba nível akordu parseiru estratéjiku boot ida-ne’ebé mak laiha limitasaun ba iha relasaun bilaterál entre nasaun rua.

“Ha’u espera katak, foinsa’e timoroan barak liután sei ba estuda no servisu iha Korea,” nia hateten.

Laureadu Prémiu Nobel da Pás ne’e hateten, iha razaun prinsipál balun ba nia hodi kontinua advokásia dezde tinan 20 nia laran kona-ba traballadór sira ba Korea no Austrália.

Dahuluk, servisu iha Korea sei fó benefísiu imediata liuhosi servisu hanesan saláriu hodi benefísia ba traballadór sira rasik no ba sira-nia família no komunidade.

Daruak, sira hetan esperiénsia iha área saida de’it mak sira servisu ba, nune’e mós sira aprende étika no dixplina servisu nian.

Datoluk, sira mós sai embaixadór boa-vontade iha fatin ne’ebé de’it mak sira servisu ba, sira  dezenvolve relasaun amizade no aprende lian no kultura hosi nasaun sira-ne’ebé mak sira serbisu ba.

“Nee mak razaun sira-ne’ebé ba ha’u hodi sempre hala’o advokásia iha tinan 20 nia laran liubá. No, hau espera katak embaixadór Korea hamutuk ho Governu Korea no Governu Timor-Leste, ita sei bele haruka ema timoroan rihun sei ba servisu iha Korea,” nia dehan.

Notísia Relevante: Taur husu traballadór Timoroan hatudu komportamentu di’ak iha Korea Súl

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!