DILI, HEADLINE, POLÍTIKA

Horta konsidera timoroan toba iha jardin Portugál tanba la organiza an

Horta konsidera timoroan toba iha jardin Portugál tanba la organiza an

Prezidente Republika, José Ramos Horta. Imajen Tatoli/Antonio Daciparu.

DILI, 08 agostu 2022 (TATOLI)—Prezidente Repúblika (PR), José Ramos Horta, konsidera timoroan sira balun hala’o viajen hosi Timor-Leste to’o iha Portugál toba de’it iha fatin públiku hanesan jardin laran tanba la’o la organiza an.

Notísia Relevante: New Generation justifika la ko’a joven nia isin antes ba Portugál

Xefe Estadu hateten situasaun ne’e la’ós akontese ba timoroan sira de’it maibé ba mós sidadaun sira rai seluk mós hanesan tanba bainhira ba la organiza an liuhosi parte kompetente hanesan Governu nune’e ikus mai hasoru situasaun refere.

“Hanesan sidadaun portugéz rihun ba rihun toba iha luron no mós hanesan sidadaun Amerikanu hanesan ha’u ba iha Nova Yorke no ba iha Inglaterra bainhira ba la organiza an la liuhosi organizasaun no Governu, ba de’it sorte situasaun sira bele akontese ne’e ba Paris no rai sira iha Europa. Ha’u kuiñese kondisaun sira-nian balun no sidadaun portugés pior liu,” PR Horta hateten ba jornalista sira iha Palásiu Prezidensiál Nicolau Lobato, Bairru Pite, segunda ne’e.

Daudaun ne’e iha rede sosiál facebook viral loos ho imajen ne’ebé hatudu timoroan lubun ne’ebé toba de’it iha jardin laran bainhira halo viajen hosi Timor-Leste atu ba buka servisu iha nasaun Europa ho ida-idak nia hakarak ne’ebé uza de’it pasaporte Timor-Leste nian.

“La’ós Estadu Timor mak atu responsabiliza ida ne’e, ita ida-idak maiória kuandu ita uza pasaporte maioridade, pasaporte Timor nian bele ba nasaun 80-resin la presiza visa on arrival,” nia dehan.

Nune’e, Xefe Estadu ne’e hateten timoroan ida-idak nia responsabilidade tanba iha Timor-Leste mós timoroan rihun ba rihun uma kondisaun laiha liu, ida-ne’e mak realidade.

“Ne’e ha’u lahatene, se Estadu iha obrigasaun ruma ba ida-ne’e. Se elementu ruma moras karik ne’e Estadu portugés rasik no Estadu ita-nian iha responsabilidade. Maibé Estadu Timor ba buka fali otél ka uma, se ba buka servisu iha Alemaña, Inglaterra, Xina servisu laiha fatin atu toba Estadu Timor mak responsável, hanoin ita la’ós labarik,” nia hateten.

Ramos Horta dehan, timoroan ida-idak responsabilidade ba an no iha nia obrigasaun iha direitu labale ba arbiru iha estranjeiru no ba karik liuhosi ajénsia ne’ebé servisu hamutuk ho Governu liuhosi Sekretária Estadu Formasaun Profisionál Empregu (SEFOPE) no SEFOPE mak haruka bele, la’ós kualkér ema mai promete lohi monu kedas no atu hala’o viajen presiza kumpre regra ka lei hosi nasaun ne’eba atu ba hanesan iha Europa, nune’e ikus labele hasoru problema oioin.

Jornalista : Nelson de Sousa

Editór      : Cancio Ximenes

iklan
iklan

Leave a Reply

iklan
error: Content is protected !!