iklan

EKONOMIA, BAUCAU, HEADLINE, MUNISÍPIU

MAP Baucau rekolla dadus atu fornese subsídiu kombustível ba agrikultór sira

MAP Baucau rekolla dadus atu fornese subsídiu kombustível ba agrikultór sira

Diretór Servisu Munisipál Agrikultura no Peska Baucau, Moises Lobato Perreira. Imajen Tatoli/Natalino Belo.

BAUCAU, 08 agostu 2022 (TATOLI) – Servisu Munisipál Agrikultura no Peska (MAP) Baucau, hahú rekolla dadus atu fornese subsídiu kombustível ba agrikultór hodi fila-rai .

Diretór Servisu Munisipál Agrikultura no Peska Baucau, Moises Lobato Perreira esplika, rekolla dadus refere hala’o liuhosi estensionista sira iha baze koopera ho autoridade postu no suku sira hanesan rekapitulasaun no selesaun tuir rekizitu hodi kontinua submete ba nasionál atu distribui kombustível iha tempu besik.

“Sira hetan kupon, ami munisípiu fasilita rekolla dadus submete ba nasionál no kompañia mak direitamente distribui mina ba benefisiáriu sira,” Diretór Servisu Munisipál Agrikultura no Peska hateten iha Vila Nova, segunda ne’e.

Bainhira dadus finaliza rekolla dadus sei kontinua kedas distribui subsídiu mina ba agrikultór sira-ne’ebé responsável direita hosi nasionál liuhosi kompañia manán-na’in Ficelia Unipesóal Lda iha Baucau.

Ekipamentu materiál agrikultura sira-ne’ebé hetan apoia kombustível komposta hosi tratór fila-rai, tratór natar, mákina baku hare inklui mákina dulas hare.

Apoia subsídiu refere hanesan parte rekuperasaun ekonómika ba komunidade agrikultór iha Baucau relasiona ho situasaun pandemia Covid-19 no folin mina atuál iha Timor-Leste.

Mekanismu subsídiu hanesan sei rekolla dadus liuhosi estensionista kolabora ho autoridade lokál kona-ba númeru mákina inklui tratór inklui identidade pesoál.

Antes ne’e, Servisu Agrikultura Baucau distribui ona kombustível mina ba benfisiáriu hamutuk tratór sia komposta hosi Dom Bosco Fatumaca tratór haat, ACELDA tolu, autoridade suku Ostiku, postu Vemasse ida no Mokatil ida.

Benfisiáriu sira-ne’e iha dereitu hetan subsídiu kombustível mina hamutuk litru 900 ne’ebé kada tratór iha direitu mina kada ekipamentu litru 100.

Jornalista   : Natalino Belo

Editór         : Evaristo Soares Martins

iklan
iklan

Leave a Reply

iklan
error: Content is protected !!