AINARO, DILI, HEADLINE, POLÍTIKA

PR husu inan-aman tau matan no fó hahan nutritivu ba bebé

PR husu inan-aman tau matan no fó hahan nutritivu ba bebé

Prezidente Repúblika, José Ramos Horta. Imajen Tatoli/Francisco Sony..

DILI, 08 agostu 2022 (TATOLI)—Prezidente Repúblika, José Ramos Horta, hateten atu kombate má-nutrisuan iha Timor-Lste inan-aman sira tenke tau matan no fó hahan nutritivu ba bebé hodi konsumu ai-han lokál.

Xefe Esatdu hateten, programa nutrisaun sai programa prioritáriu Prezidente Repúblika (PR) nian hodi kombate má-nutrisaun iha Timor-Leste, liuhosi promosaun produtu lokál no nutritivu ba inan-aman no kosok-oan sira (bebé), tanba ne’e iha diálogu ho komunidade Ainaro, nia parte partisipa iha kampaña nutrisaun liuhosi formasaun no demonstrasaun ai-han nutritiva ne’ebé asiste  hosi komunidade no estudante sira iha Ainaro Vila.

Notísia Relevante: PR lansa kampaña programa “Nutrisaun Di’ak, Povu Saudavél, Nasaun Forte” iha Railaco

“Ba aman sira, tane imi-nia feen, hamutuk tau matan ba ksolok-oan sira. Haree hahan didi’ak ba kosok-oan sira, tuir rekomendasaun mai hosi Ministériu Saúde no Ajénsia sira, fó hahan prioriedade ba sira, labele diskrimina feto ka mane, fó ai-fuan, fehuk no batar, hakiak animál, kuda ai-fuan barak,” Prezidente Repúblika hateten liuhosi komunikadu imprensa ne’ebé Agência Tatoli asesu hosi Palásiu Prezidensiál Nicolau Lobato, Bairru Pite, Dili, segunda ne’e.

Kampaña nutrisaun liuhosi formasaun no demonstrasaun ai-han nutritiva n’e apoiu hosi ajénsia sira hanesan Plan Internasionál, Programa Mundiál Alimentasaun, Percic no Ministériu Saúde promete atu promove programa nutrisaun hosi Prezidénsia Republika.

Iha fatin hanesan, Jestor Plan Internasionál munisípiu Ainaro, Valentím Magno Soares, hateten Plan Internasionál iha komprimissu atu apoiu Prezidente Repúblika nia programa espesiál kombate má-nutrisaun iha Timor-Leste liu-liu iha munisípiu Ainaro.

Tanba, Plan Internasionál durante besik tinan 20 ona luta atu hatun má-nutrisaun iha munisípiu liu-liu iha Ainaro no Aileu ne’ebé iha má-nutrisaun aas, nune’e ema hotu tau liman hamutuk hodi luta ba problema má-nutrisaun ida-ne’e.

Reprezentante Programa Mundiál ba Alimentasaun (WFP, siglá inglés), Josefina Maria Pereira, promote atu disemina informasaun ba komunidade no halo advokasia hodi hasa’e kuiñesimentu komunidade nian kona-ba importánsia konsumu ai-han lokál.

“Iha kombate má-nutrisaun buat ne’ebé apoiu mak atu ajuda hodi kontinua disemina informasaun relasiona ho nutrisaun no kontinua halo advokasia iha nível komunidade atu hasa’e sira-nia kuiñesimentu, liu-liu kona-ba ai-han lokál sira tanbá menus kuiñesimentu nune’e laiha prioriedade,” nia hateten.

Nutrisionista husi PARCIC, Julmira Soares, hateten ajénsia ne’e sei suporta programa ne’e liuhosi tein ai-hán nutritivu ba inan isin-rua to’o bebé moris mai durante tinan rua.

“Durante ne’e ami-nia programa pilotu iha Ermera no Dili maibé agora Prezidente Repúblika husu atu ami apoiu,” nia dehan.

PARCIC prontu apoiu liuhosi kursu te’in tanbá PARCIC nia programa iha tolu mak hanesan tein, nutrisaun no to’os eskolr.

“Ne’eduni, hanesan  timoroan sente kontente tanba  hakarak luta hasoru kazu má-nutrisaun ne’ebé aas, tanba tuir peskiza má-nutrisaun ho 40%-resin. Tan ne’e, ami hato’o ba inan-isin rua oinsá prepara hahan nutrisaun hosi inan isin-rua to’o bebé moris durante tinan rua,” nia hateten.

Programa nutrisaun promove hosi divizaun nutrisaun hosi Prezidénsia Repúblika ho apoiu hosi ajénsia sira no Ministériu Saúde (MS).

Notísia Relevante: Labarik TL 47% má nutrisaun krónika

 

https://tatoli.tl/2021/07/13/labarik-tl-47-ma-nutrisaun-kronika/

Jornalista : Nelson de Sousa

Editór      : Cancio Ximenes

iklan
iklan

Leave a Reply

iklan
error: Content is protected !!