EKONOMIA, HEADLINE

SEP no SEKoop asina akordu kooperasaun promosaun no dezenvolvimentu kooperativa peska

SEP no SEKoop asina akordu kooperasaun promosaun no dezenvolvimentu kooperativa peska

Sekretáriu Estadu Peska, Elídio de Araújo no Sekretáriu Estadu Kooperativa, Elizário Ferreira, asina protokolu kooperasaun ba promosaun no dezenvolvimentu kooperativa peska, iha salaun MAP, tersa (08/08). Imajen Tatoli/Francisco Sony

DILI, 08 agostu 2022 (TATOLI)–Sekretaria Estadu Peska (SEP) no Sekretaria Estadu Kooperativa (SEKoop), segunda ne’e, asina protokolu kooperasaun ba promosaun no dezenvolvimentu kooperativa peska.

Sekretáriu Estadu Peska, Elídio de Araújo, hateten objetivu akordu ne’e atu fó apoiu ba peskadór sira hodi hatan ba meta VIII Governu atu hasa’e konsumu ikan hosi kilograma 6,1 ba kilograma 10 ba ema ida kada tinan, iha tinan 2023, ne’ebé bazeia ba vizaun SEP oinsá atu haree peskadór no hakiak na’in ba ikan sira bele haboot sira-nia grupu.

“Ita presiza halo kooperasaun hodi fó kapasitasaun ba grupu peskadór no grupu agrikultór sira hodi fasilita sai hanesan grupu ka forma kooperativa ida,” Sekretáriu Estadu Elídio de Araújo hateten, iha salaun Ministériu Agrikultura no Peska (MAP), Comoro.

Notísia relevante: Funsionáriu MOP 40 tuir formasaun bázika no estabelesimentu kooperativa

Bainhira forma ona peskadór sai kooperativa maka transforma ona hanoin atu tama kooperativa.

“Kapasitasaun ne’ebé sei halo mak oinsá muda mentalidade no fó formasaun ba jestaun finseiru, nune’e fasilita sira bele halo jestaun ba finansiamentu bainhira fa’an ikan,” nia akresenta.

Daudaun ne’e grupu hakiak ikan hamutuk 426 no ikan ne’ebé Governu ditribui ba sira hakiak ne’e daudaun iha 1.150 resin ona.

“Atu hasa’e komunidade nia konsumu ikan maka presiza halo asaun ho ita-nia peskadór sira no hakiak ikan sira tanba iha dadus hatudu katak ita-nia peskadór iha Timor laran tomak hamutuk 6.678 , hakiak ikan 427, no hosi hakiak na’in forma fali sira-nia grupu peskadór ne’e hamutuk 1.310 no  arkikultura hamutuk 427,” nia informa.

Iha fatin hanesan, Sekretáriu Estadu Kooperativa, Elizário Ferreira, hateten, inisiativa ne’e atu asegura bem estár peskadór sira iha tasi no sira ne’ebé hakiak ikan iha rai-maran.

“Objetivu prinsipál asina akordu mak parte kooperativa sei organiza peskadór sira iha kooperativa hodi asegura no halo jestaun organizasaun ba sira, inklui asegura jestaun finanseira no jestaun ekonómiku, atu nune’e peskadór sira bele sai profisionál, benefisiáriu no asegura bem estár ba sira-nia família,” governante ne’e fó hanoin.

Nune’e, parte SEKoop sei halo formasaun no divulga informasaun tanba konsidera kooperativa hahú ho edukasaun no dezenvolve.

“Kontrolu no dependénsia totalmente ba eduksaun, tanba bainhira kooperativa laiha edukasaun maka sei la dezenvolve-an ho realidade ne’ebé mak iha, tanba ne’e edukasaun sai baze dahuluk ba dezenvolvimentu kooperativa,” nia tenik.

Jornalista   : Arminda Fonseca

Editora        : Julia Chatarina

iklan
iklan

Leave a Reply

iklan
error: Content is protected !!