EKONOMIA, HEADLINE, MUNISÍPIU, OÉ-CUSSE (RAEOA)

Abitante 650 iha Kiupanaf RAEOA asesu ona bee-moos

Abitante 650 iha Kiupanaf RAEOA asesu ona bee-moos

Perfurasaun sistema bee-moos iha Sonamnasi. Imajen/Mídia ZEESM.

OÉ-CUSSE, 09 agostu 2022 (TATOLI) – Abitante hamutuk 650 hosi bairru Kiupanaf asesu ona bee-moos hosi perfurasaun sistema bee-moos Sonamnasi, pertense ba suku Cunha, sub-rejiaun Pante Makasar, Rejiaun Administrativa Espesiál Oé-Cusse Ambeno (RAEOA).

Perfurasaun sistema bee-moos ne’ebé konstrui iha bairru Sonamnasi hodi fó bee ba uma kain-187 ho populasaun-850, maibé tinan ne’e autoridade RAEOA, deside kanaliza tán ba bairru Kiupanaf hodi fasilita abitante 650 iha bairru ne’e.

Xefe Departamentu Servisu Água no Saneamentu (DSAS), RAEOA, Zulmira da Silva, hatete, perfurasaun sistema bee-moos iha Sonamnasi dezenvolve ona hodi kanaliza tán ba bairru Kiupanaf, tanba debitu volume bee sufisiente atubele kobre to’o fatin ne’e.

“Ita haree volume bee iha perfurasaun Sonamnasi ne’e boot, entaun DSAS deside konstrui tán tanki rezervatóriu ida atu instala liña transmisaun no torneira unidade 12 ba benefisiáriu 650 envolve uma-kain 130 iha bairru Kiupanaf,” Zulmira da Silva, informa ba Agência Tatoli iha Oé-Cusse, tersa ne’e.

Projetu perfurasaun sistema bee-moos iha Sonamnasi, autoridade RAEOA inaugura iha outubru 2021, nia medida tanki bee distribuisaun 5X10, ho nia volume bee litru 100.000 hodi atende família uma kain-187 ho populasaun-850 iha bairru Sonamnasi.

“Tanba perfurasaun ne’e nia profunda metru 80 ho casing ins-8, nia débitu iha perfurasaun atinje 6,45 litru pór-segundu, no instalasaun liña eletrisidade ba obra perfurasaun ho bomba kompletu inklui asesor sira seluk, konsege instala torneira unidade 18 iha Sonamnasi,” nia katak.

Purantu, perfurasaun sistema bee-moos iha Sonamnasi ne’e ezekuta empreza lokál Nun-Mabun Unipesoál, Lda, ho valór kontratu $156,325.73, autoridade RAEOA aloka hosi Orsamentu Jerál Estadu (OJE) 2021.

Xefe suku Cunha, Domingos Seko Caunan agradese ba autoridade RAEOA, tanba iha bairru Sonamnasi no Kiupanaf durante tinan barak populasaun sira konsumu de’it bee-mota no maioria uza bee-posu maibé tempu bailoron maran.

Autoridade komunitária ne’e konta, problema ne’ebé komunidade Kiupanaf enfrenta hanesan mós akontese iha komunidade Sonamnasi, tanba enfrenta problema bee-moos dezde tempu portugés.

“Ami agradese ba autoridade tanba bele harii fasilidade bee-moos ne’e iha bairru ne’e, tanba durante tinan barak populasaun iha Sonamnasi no Kiupanaf garantia de’it ba bee-mota no bee-posu hodi konsumu, no atividade seluk, maibé to’o tinan 2021 autoridade tulun ona ami iha fatin ne’e, ami sei la susar ona ba bee-moos,” lidér lokál ne’e agradese.

Projetu kanalizasaun hosi perfurasaun sistema bee-moos Sonamnasi liga ba bairru Kiupanaf ezekuta hosi empreza Pandi Silnes Unipessoal Lda, ho valór kontratu $77,942.81, autoridade aloka hosi Orsamentu Jerál Estadu (OJE) 2023.

Notísia relevante: Konstrusaun perfurasaun bee-moos iha Sonamnasi atinje ona 57%

Jornalista   : Abílio Elo Nini

Editór         : Evaristo Soares Martins

iklan
iklan

Leave a Reply

iklan
error: Content is protected !!