DILI, POLÍTIKA

AEAL: Moras Lepra aas iha Baucau-Dili-Manatuto-RAEOA

AEAL: Moras Lepra aas iha Baucau-Dili-Manatuto-RAEOA

Asosiasaun Ema Afeta Lepra Timor-Leste (AEAL), tersa ne\e, hala’o enkontru ho Prezidente Repúblika, José Ramos Horta. Imajen/Midia PR.

DILI, 09 agostu 2022 (TATOLI)—Asosiasaun Ema Afeta Lepra Timor-Leste (AEAL), tersa ne’e, hala’o enkontru ho Prezidente Repúblika, José Ramos Horta, iha palásiu Prezidensiál Nicolau Lobato, Bairru Pite, Dili.

Notísia Relevante: Hena-Mutin Iha Isin-Lolon La Sente Katar No Moras, Sintoma Lepra

Diretór Asosiasaun Ema Afeta Lepra Timor-Leste (AEAL), Joel Costa dos Santos, hateten iha enkontru hato’o situasaun real ne’ebé mak afeta Lepra iha Timor-Leste liu-liu liga ba sira-nia moris no kondisaun hasoru durante etapa tratamentu no mós área ne’ebé alvu númeru kazu aas iha Timor-Leste.

Nia hateten, maske daudaun ne’e AEAL seidauk iha dadus adekuadu maibé númeru moras Lepra ne’ebé aas liu ne’e akontese iha munisípiu Baucau, Dili, Manatuto no Rejiaun Administrativa Espesial Oé-Cusse Ambeno (RAEOA).

“Iha tinan hirak liubá kotuk asaun ne’ebé iha, Estadu Tmor-leste konsege elimina tiha ona moras Lepra iha Timor-Leste maibé moras Lepra ne’e nafatin eziste. Númeru moras lepra ne’ebé aas liu mak iha Munisípiu Dili, Baucau, Manatuto no RAEOA,” Joel Costa dos Santos hateten ba jornalista sira hafoin ramata enkontru ho Xefe Estadu, José Ramos Horta.

Razaun AEAL seidauk iha dadus adekudau kona-ba moras Lepra iha Timor-Leste tanba asosiasaun ne’e estabelese iha 2019 no foin hetan legalidade iha fulan-abríl 2022, hanesan organizasaun ida-ne’ebé tau matan ba ema afeta ho moras Lepra no garante katak sei laiha tan diskriminasaun, laiha estigma hasoru ema ho moras Lepra no tratamentu sei adekuadu.

Iha enkontru ne’e, Prezidente Repúblika (PR), José Ramos Horta, sei halo aproxsimasaun ho Ministéiru Saúde (MS) no Organizasaun Mundiál Saúde (OMS) atu halo kampaña prevensaun ba moras Lepra iha Timor-Leste.

Nune’e mós, PR sei halo aprosimasaun ho nasaun doadór sira hodi fó apoiu ba pasiente sira-ne’ebé afeta moras Lepra no Xefe Estadu promete atu halo dezlokasaun ba iha munisípiu sira-ne’ebé mak iha sidadaun ne’ebé ho númeru moras Lepra aas liu-liu iha Baucau, Manatuto no RAEOA.

Notísia Relevante: Kada tinan, HNGV rejista ema ho lepra 30-resin

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!