DILI, HEADLINE

Alkatiri garante Ró Haksolok sei mai Timor-Leste

Alkatiri garante Ró Haksolok sei mai Timor-Leste

Ró Haksolok. Imajen/Dok. ZEESM

DILI, 09 agostu 2022 (TATOLI)—Eis Prezidente Rejiaun Administrativa Espesiál Oe-Cusse Ambeno (RAEOA), Mari Alkatiri, garante Ró Hakslok sei mai Timor-Leste (TL).

Notísia Relevante: PN aprova millaun $127 ba RAEOA inklui millaun $14 finaliza Ró Haksolok

“Ró Haksolok agora ita-nian ona no 95% empreza ne’e Timor nia investimentu ona iha estaleiru. Entaun Ró Haksolok ita-nian ona, falta de’it agora atu kria kondisaun atu ró ne’e prontu lori mai,” Eis Prezidente RAEOA ne’e hateten hodi responde ba jornalista sira iha Palásiu Prezidensiál Nicolau Lobato, Bairru Pite, Dili, tersa ne’e.

Tan ne’e, nia dehan, agora presiza mak kontinua hala’o fiskalizasaun ba Ró Hasolok ne’e atu hahú.

“Kondisaun mak fiskalizasaun tenke iha hodi ró ne’e atu hahú ne’ebé problema hotu-hotu rezolvidu no ne’e investimentu primeiru Timor nian iha rai Europa. Ha’u lakohi kompleta tan to’o  kampañia ema ko’alia mak ha’u hatán,” nia dehan.

Notísia Elevante: Tribunál Konta hahú hala’o auditória ba Ró Haksolok  

Ró Haksolok inaugura iha loron 26 maiu 2017 iha sidade Figuerra da Foz, Portugál no tuir informasaun sei to’o iha outubru 2017, maibé tanba problema internál empreza ho sub-kontratór mak to’o agora ró seidauk to’o iha Timor-Leste.

Ró Haksolok ho kustu millaun €13,7, iha kapasidade atu tula ema na’in-377 no karreta hamutuk 15.

Enkuantu, prosesu konstrusaun ba ró, ninia kontratu asina iha 2014 entre Governu no empreza portugés no konstrusaun konsege paradu, maibé bainhira estabelese ZEESM, prosesu konstrusaun ró-ahi ne’e entrega ba autoridade RAEOA mak responsabiliza.

Desizaun atu hili ninia estaleiru, hosi V Governu Konstitusionál, ne’ebé selebra kontratu ho estaleiru Atlantic Eagle Ship Building, Lda iha loron 22 setembru 2014.

RAEOA-ZEESM simu prosesu konstrusaun ró liuhosi transferénsia projetu no alokasaun orsamentu hosi Governu sentrál ba autoridade hodi transfere podér no alokasaun verba ne’ebé akontese entre Governu no Estaleiru Atlantic Eagle ship Building.

Atu garante implementasaun tuir espesifikasaun no padraun tékniku ba ferry ró Haksolok no asegura katak bele hetan rejistu internasionál tuir rekezitu Governu Timor-Leste, mak RAEOA-ZEESM selebra kontratu supervizaun ba konstrusaun ferry ho institutu soldadura no kualidade (ISQ, sigla portugés) ne’ebé hanesan instituisaun ho esperiénsia liu tinan 50 ho konstrusaun ne’ebé kredensiál atu fiskaliza konstrusaun.

Notísia Elevante: Marí Alkatiri entrega asuntu ró Haksolok ba Prezidente Autoridade RAEOA

Jornalista : Nelson de Sousa

Editór       : Cancio Ximenes

iklan
iklan

One Comment

  1. Ko’alia ne’e tenke ho konviksaun, nune’e, bainhira dehan atu mai karik temi ho data ruma atu ema bele fiar.

Leave a Reply

iklan
error: Content is protected !!