DESPORTU, DILI, HEADLINE

Assalam preokupa FFTL-LFTL seidauk deside data realiza liga époka 2022

Assalam preokupa FFTL-LFTL seidauk deside data realiza liga époka 2022

Prezidente Assalam FC, Hipolito Soares. Imajen/Espesiál

DILI, 09 agostu 2022 (TATOLI) – Kalendáriu tentativa fó sai ona iha fulan-rua ba kotuk, katak liga époka sei realiza iha 18 agostu 2022, maibé Federasaun Futeból Timor-Leste no Liga Futeból Timor-Leste (LFTL) to’o ohin loron seidauk iha desizaun final kona-ba data fiksu ba realiazasaun liga époka 2021.

Liga Futeból Timor-Leste (LFTL), loke ona janela transferénsia ba klube 19 ne’ebé hamahan-an iha LFTL hodi halo rejistu ba jogadór, nune’e bele partisipa iha liga époka ne’e tuir kritéria no oráriu Asian Football Confederation (AFC) nian loke ona iha 10 fevereiru to’o 10 marsu liubá.

Notísia relevante: 18 agostu, LFTL abertura jogu primeiru no segundu divizaun époka 2022

Ho nune’e, Prezidente Klube Primeira Divizaun Assalam FC, Hipolito Soares, husu ba orgaun Liga Futeból Timor -Leste (LFTL) no Federasaun Futeból Timor-Leste (FFTL) atu kria komunikasaun ida armonia ka di’ak hodi deside data fiksu realiza liga époka 2022-2023.

“Liga atu la’o parte rua FFTL no LFTL tenke aten-brani realiza enkontru ho klube hotu atubele ko’alia ba malu, nune’e liga ne’e bele la’o lais,” Prezidente Hipolito hateten ba Agência TATOLI iha Dili, tersa ne’e.

Nia preokupa mós antes ne’e, FFTL no LFTL liuhosi lideransa sira deklara ona liga époka 2022 sei realiza iha 18 agostu 2022, tuir kalendáriu Federation International Football Association (FIFA), maibé to’o agora seidauk iha preparasaun hosi parte-rua.

Notísia relevante:  LFTL preparadu realiza liga futeból époka 2022

Maske nune’e, Assalam nafatin preparadu hodi fó ona kontratu ba jogadór hamutuk na’in-24 atu prepara ba joga iha liga époka ne’e, Hosi númeru refere iha jogadór timoroan no balun estranjeiru.

LFTL loke ona janela transferénsia époka 2022

Prezidente LFTL, Nilton Telmo Gusmão, deside iha loron (21/02) to’o (21/03) loke ona janela transferénsia ba klube 19 ne’ebé hamahan-an iha LFTL hodi halo rejistu ba jogadór nune’e bele partisipa iha liga époka 2022, tuir kritéria no oráriu   Asian Football Confederation (AFC) nian loke ona iha 10 fevereiru to’o 10 marsu.

LFTL mós husu ba klube hotu atu hakbesik an ba edifisiu LFTL hodi rejista naran jogadór sira nune’e bele kompete iha liga tinan 2022 nian.

Iha époka ne’e kompetisaun sei la’o nakonu iha tinan ida nia laran, tuir kalendáriu tentativa ne’ebé iha.

Entretantu, jogu ba primeira divizaun ba primeira volta no segunda volta sei halao iha Estádiu Munisipál Dili no Estádiu Gleno ho totál jogu 90 ba klube 10 ne’ebé tuur hela iha primeira divizaun. Enkuantu ba segunda divizaun klube sia (9) sei joga de’it iha Estádiu Munisipal Dili hamutuk jogu 36.

Klube 19 ne’e mak hanesan primeira divizaun AD SLB Laulara, AS Ponta Leste, Karketu Dili FC, Assalam FC, Emanuel FC, Aitana FC, Lalenok United FC, Atletico Ultramar, Academica FC no Porto Taibessi FC.

Enkuantu, Segunda Divizaun mak hanesan, Kablaki FC, Nagardjo FC, DIT FC, Lica-Lica FC, Lemorai FC, AS Marca, FIEL FC, Zebra FC no Boavista FC Timor.

Notísia relevante: Hahú ohin, LFTL loke janela transferénsia époka 2022

Jullu, FFTL hahú loke janela transferénsia ba Liga Feto Timór

Jornalista: Hortencio Sanchez

Editór       : Florencio Miranda Ximenes

iklan
iklan

Leave a Reply

iklan
error: Content is protected !!