BOBONARO, 09 agostu 2022 (TATOLI) – Diretór Servisu Edukasaun Munisípiu Bobonaro, Crispim Moniz, fó-sai katak, iha loron-segunda ne’e hahú destaka ona funsionáriu eskritóriu hamutuk na’in-30 ba postu administrativu neen hodi halo monitorizasaun ba ezame trimestre daruak iha tinan letivu 2022.
Notísia relevante: Dom Martinho Lopes, eskola dahuluk iha Bobonaro implementa ‘Eskola Verde’
“Atu hatene kona-bá andamentu ezame ne’e la’o ho di’ak ka lae, ami iha koordenasaun ho parte inspesaun, alende ida-ne’e servisu edukasaun mos forma ekipa ida, ne’ebé kompostu hosi funsionáriu iha eskritóriu laran hamutuk 30 pesoa, destakadu hosi halo monitorizasaun ba realizasaun ezame segundu trimestral,” nia ko’alia iha Maliana, tersa ne’e.
Nia akresenta, tuir kalendáriu hosi Ministériu Edukasaun, Juventude no Desportu (MEJD) katak ezame trsimestre daruak ne’e komesa iha segunda no termina iha sábadu, 13 fulan-agostu, maibé daudaun ne’e prosesu ezame la’o di’ak hela tuir kurríkulu ne’ebé fó-sai ona.
“Ezame hahú horisehik to’o agora, hau seidauk simu reklamasaun ruma kona-bá ezame ne’e la’o ho di’ak ka lae, ne’ebé buat hotu la’o ho di’ak hela,” nia hateten.
Tuir dadus hosi Servisu Edukasaun Munisípiu Bobonaro totál estudante ne’ebé partisipa ezame treimestre daruak ne’e hosi ensinu báziku na’in 24,601, ensinu sekundáriu jerál (ESG, sigla portugés) na’in 3.901, tékniku vokasionál (TEKVOK) na’in 1,607.
Nune’e mós eskola bázika filiál (EBF) hamutuk 112, ensinu báziku sentrál (EBC, sigla portugés) 30, sekundariu jerál hitu no tékniku vokasionál ualu sei halo ezame modulár de’it.
Crispim dehan, bainhira konklui ezame iha loron-sábadu ekipa monirizasaun sei aprezenta dadus loloos totál estudante hamutuk na’in hirak mak la partisipa ezame trimestre daruak ne’e.
“Bainhira identifíkadu iha alunu balun, laiha posiblidade atu tuir ezame, kondisaun fízika, moras no seluk, ami bele koordena orienta eskola sira, depois bele determina loron ketak ida, atubele fó ezame segunda semana ba alunu ne’ebé la partisipa,” nia hatutan.
Enkuantu bainhira identifika estudante feto ne’ebé ho kondisaun grávida,mak sei hein orientasaun hosi Ministériu Edukasaun, Juventude no Desportu mak deside posibilidade bele partisipa ka lae.
Adjuntu-diretór EBC númeru 1 Maliana, Rafael dos Reis Soares, hateten, prosesu ezame eskola ne’e la’o di’ak, tanba antes ne’e halo preparasaun ba revizaun loron ida dispina rua hahú hosi sétimu-anu to’o nonu-anu.
Nia akresenta, prosesu ezame iha faze tolu, primeiru ba sétimu-anu, segunda faze oitavu-anu, hafoin estudante sira hosi nonu-anu halo distansiamentu nune’e estudante sira labele kópia matéria ba malu
“Alunu idak-idak tenke fiar ninia-aan hodi hala’o ezame iha segundu periodu ne’e, tanba pontu ezame ami prepara tuir buat-ne’ebé maka profesór sira hanorin tiha ona iha ensinu apredizajen durante períodu ida tomak,” nia dehan.
Enkuantu estudante iha ekola ne’e hamutuk na’in 701, kompostu hosi sétimu-anu 199, oitavu- anu 229, nonu-anu 273.
Enkuantu ba estudante primeiru-siklu to’o terseiru-siklu la halo ezame tanba tuir kurríkulu só halo de’it prova avaliasaun formativa formál kada periodu, depois períodu ikus nian sei iha tán provas aferisaun hodi haforsa avaliasaun sira antes ne’e.
Notísia relevante: Serbisu Edukasaun Bobonaro iha programa solidariedade
Jornalista : Sérgio da Cruz
Editór : Evaristo Soares Martins
