DILI, POLÍTIKA

Eskritór Paulo entrega livru “As Memoria da Guerra em 1975-1979” ba PR Horta

Eskritór Paulo entrega livru “As Memoria da Guerra em 1975-1979” ba PR Horta

Eskritór livru “As memoriás da Guerra em 1975-1979”, Paulo da Costa. Imajen/Mídia PR.

DILI, 09 agostu 2022 (TATOLI)—Antigu Kombatente FALINTIL no Eskritór, Paulo da Costa, tersa ne’e hala’o audiénsia no entrega livru “As memoria da Guerra em 1975-1979” ba Prezidente Repúblika (PR), José Ramos Horta, iha Palásiu Prezidensiál Nicolau Lobato, Bairru Piye, Dili.

“Ha’u halo audiénsia ho Prezidente Repúblika, ha’u entrega livru ida ba Prezidente Repúblika. Lvru ne’e ha’u rasik mak hakerek intítluladu “Ás Memória Guerra em 1975-1979,” Paulo da Costa Armal hateten ba jornalista sira hafoin ramata enkontru ho Xefe Estadu, José Ramos Horta.

Kombatente Falintil ne’e hateten, livru ne’e refleta kona-ba ninia perkursu iha tinan 1974 no guerra sivíl entre Fretilin no UDT, guerra kontra um guerra iha fronteira, guerra kontra okupasaun Indonézia iha Timor rezisténsia kontra forsa Indonézia.

Iha livru ne’e haktuir kona-ba, reuniaun istóriku Soibada-Manatuto, reuniaun istóriku Lalini ida-ne’ebé bootliu hotu durante tempu guerra durante tinan 24 nia laran no tropa Indonézia halo serku iha Timor-Leste.

“Purtantu ha’u ko’alia barakliu kona-ba Lalini, kona-ba estratéjia saida mak adota iha Fretilin tinan hirak liuba, tantu estratéjia guerra da Lalini ne’e Fretilin adota,” nia dehan.

Depois enkontru Lalini komesa estabelese zona apoiu tranzisaun, zona gerrilleiru tantu halo rezultadu boot tebes ba iha ezersisíu FALINTIL ida-ne’e.

“Ha’u hakerek iha livru no ko’alia barak ho Prezidente Repúblika kona-ba Lalini, to’o ha’u konversa ho PR hau’ hato’o katak ita-nia moeda aban bainrua ne’e bele mós sai Lalini. Se ita hotu profunda didi’ak istória Lalini nia katak saida mak akontese iha Lalini, ema halo saida iha Lalini ema laiha dúvida ne’ebé naturalmente sempre iha proposta di’ak,” nia hateten.

Nune’e, veteranu ne’e nia-parte ko’alia ho PR katak TL nia moeda aban bainrua ne’e bele tau Lalini.

Livru “As Memoriás da Guerra em 1975-1979” iha pájina hamutuk 682 ne’ebé lansa hosi Centro Nacional Chega (CNC) iha tinan kotuk no hakerek ho lian portugés. Livru ne’e prodús no ramata iha tinan 2020 no livru ne’e hakerek atu sai referénsia ba jerasaun foun.

Konvida PR vizita Poerema

Antigu Kombatente FALINTIL, Paulo da Costa Armal, hateten durante sorumutu nia-parte konvida PR atu ba vizita fatin Poerema iha Cailaco-Bobonaro.

“Ha’u hateten ba Prezidente Republika katak Indonézia ba populasaun hotu-hotu iha Timor-Leste espesiál ba Maliana, Indonézia okupa ne’e iha 16 outubru 1975. Entaun, hakarak konvida no ba karik iha 16 outubru hodi komemora 47 Indonézia okupa Maliana no PR resposta hakarak loos atu ba vizita,” nia dehan.

Nia mós sujere bainhira PR vizita atu akompaña mós lidér nasionál Xanana Gusmão ho Abel Ximenes tanba sira-ne’e sobrevivente úniku ne’ebé tuir reuniaun konsellu superiór luta iha Lalini hosi 10 maiu to’o 09 jullu tinan 1977 ba reuniaun bootliu hotu durante guerra ne’e mak iha Lalini ne’e.

“Ami husu antes Prezidente nia mandatu ramata atu ba vizita Werun iha Natarbora, fatin mak realiza konferénsia hosi pasajen guerra ba pozisaun gerrilleiru no Prezidente hakarak vizita, tanba ne’e ba halo mós komemora terseiru aniversariu indepedénsia Timor-Leste nian,” nia sujere.

Tanba, nia dehan, fatin tolu hansan Poerema, Lalini ho Werun mak PR sei ba halo vizita tanba fatin sira-ne’e fatin istóriku hodi bele informa ba jerasaun foun sira hodi hatene istória no livru ne’e nia-parte hakerek istória sira-ne’e mós.

Jornalista : Nelson de Sousa

Editór      : Cancio Ximenes

iklan
iklan

One Comment

  1. Bom Dia
    Sr.komphaneiru, agrades wain ba ita bot tamba ho esforsu tomak bele ona hakerek livru foun iha etapa ida ne’e atu lembra ba jerasaun foun sira konaba istoria luta da libertasaun nasional Timor-Leste. Maibe sr.Komphaneiru ami sidauk hetan livru nebe mak ita bot publika ona. espera istoria nebe mak iha bele ona kobre hotu luta Timor oan sira nian. Obrigado wain

Leave a Reply

iklan
error: Content is protected !!