BAUCAU, 09 agostu 2022 (TATOLI) – Governu liuhosi Ministériu Saúde (MS) tersa ne’e, realiza enkontru nasionál hodi diskute integra vasinasaun Covid-19 ba programa imunizasaun rútina no preparasaun ba kampaña vasinasaun sarampu rubella inklui fahe vitamina A no albendazole ba komunidade.
Vise Ministru Saúde, Bonifácio Maucoli dos Reis, esplika, liuhosi sorumutu sei akumula ideia hotu hodi iha kompromisu hamutuk halo revizaun nasionál atu hasa’e kobertura ba programa imunizasaun inklui integrasaun vasina covid-19 ba vasina rútina.
Alende ne’e, prepara kampaña nasionál luta kontra moras sarampu, rubella no polio inklui distribusaun ai-moruk lumbringa, alebendazol liuhosi renovasaun modelu atensaun ba saúde primária no modelu saúde família.
“Integrasaun prestasaun serbisu mak dalan di’akliu atu hasa’e kobertura ba programa sira, konseitu integrasaun dahuluk tenke akontese iha nível nasionál integradu iha supervizaun suportivu, monitorizasaun no konseitu intervensaun nune’e mós iha polítika ka desizaun estratéjika sira,” Vise Ministru Saúde hateten iha Sentru Konvensaun Baucau (CCB, sigla portugés).
Vasina covid-19 sai programa vasinasaun rútina relasiona ho ameasa pandemia ne’ebé nafatin eziste iha mundu no sai momentu foun tanba ne’e presiza iha kompromisu hosi entidade relevante hotu katak vasina tenke sai nu’udar atividade ne’ebé implementa iha nível kuidadu ospitál no programa saúde primária.
Ho estabelesimentu unidade saúde família hanesan estratéjia xave modelu implementasaun foun tanba sai pontu entrada ba implementasaun programa sira iha kuidadu saúde primária no atu fasilita kontaktu entre populasaun, família no membru ida-ida ho serbisu nasionál saúde.
“Ho konseitu foun sei hakbesik serbisu ba komunidade nune’e beibeik no neineik bele liberta povu hosi problema saúde oinoin ne’ebé ita hasoru,” Bonifácio akresenta.
Bonifácio husu partisipante foku durante loron-tolu atu kria diskusaun hodi hetan forma hodi integra vasina covid-19 ba programa vasina rútina sira tanba pandemia kontinua eziste inklui vasina rútina sei kontinua iha númeru kiik.
Governante ne’e rekoñese durante kampaña vasina covid-19, MS infrenta dezafiu maibé konsege ultrapasa situasaun refere hodi hasa’e kobertura ba vasinasaun iha territóriu nasionál hamutuk 88% kompostu idade 18 ba leten doze dahuluk hamutuk 87,4%, doze daruak 77% no booster 23,3%.
Enkuantu ba labarik idade tinan-12 to’o 17 vasinasaun doze dahuluk atinje ona 92,5% no doze daruak 77,5%.
Diretór Servisu Saúde Baucau, Domingos Reinaldo da Costa Guterres hateten, prezensa partisipante iha Baucau atu inkontru durante loron-tolu hahú ohin to’o loron-11 agostu hodi inkontru kona-ba integra vasinasaun covid-19 ba programa saúde família no sai nu’udar programa vasinasaun ruúina ba komunidade.
“Urgullu tanba bele dezenvolve ita-nia munisípiu ba ema hotu tanba maluk sira mai envolve mós NGO internasionál no nasionál inklui maluk sira maihosi munisípiu seluk ne’ebé seidauk hatene Baucau,” nia katak.
Totál partisipante iha inkontru nasionál durante loron-tolu refere hamutuk na’in-624 klompostu diretór jerál, diretór nasionál, diretór munisipál, xefe sentru saúde no responsabilidade programa saúde familiár, promosaun saúde no imunizasaun ne’ebé mai hosi 12 munisípiu inklui RAEOA.
Jornalista : Natalino Belo
Editór : Evaristo Soares Martins
