PR Horta-Alkatiri hakarak buka konsensu entre líder nasionál
DILI, 09 agostu 2022 (TATOLI)—Prezidente Repúblika (PR), José Ramos Horta, tersa ne’e, hala’o enkontru ho eis Primeiru-Ministru (PM) no atuál Sekretáriu Jerál Partidu Frente Revolucionária de Timor-Leste Independente (FRETILIN), Mari Alkatiri, hodi koa’alia kona-ba oinsá buka konsensu nasionál entre líder nasionál iha Timor-Leste.
“Ha’u kuiñese di’ak Prezidente Repúblika no Prezidente kuiñese di’ak ha’u. Ha’u hatene Prezidente Repúblika ema ida hakarak duni buka konsensu no nia mós hatene ha’u ne’e ema balun dehan ha’u mak obstákulu. Maibé, to’o agora ha;u desde to’o iha Timor, se mak buka konsensu liu mak ha’u ne’e,” Eis Primeiru-Ministru, Mari Alkatiri, hateten ba jornalista sira hafoin ramata enkontru ho Xefe Estadu, José Ramos Horta, iha Palásiu Prezidensiál Nicolau Lobato, Bairru Pite.
Sekretariu Jerá FRETILIN ne’e hateten, durante sorumutu ho Prezidente Repúblika ne’e sira ko’alia asuntu lubun ida mak oinsá hamutuk buka solusaun ida sustentavel ba dezenvolvimentu nasaun Timor-Leste nian.
“Ita-nia rai ne’e presiza ita hotu ko’alia ba malu hodi buka solusaun ida sustentavel atu hadi’a saida mak tenke hadia no saida mak ita tenke hametin. Maibé, tenke hamutuk atu bele husik hela ba jerasaun aban-bainrua, situasaun ida labele todan demais no situasaun ida jerasaun aban-bainrua hanoin,” nia hateten.
Mezmu nune’e, Mari Alkatiri la ko’alia kona-ba pontu espesífiku durante sorumutu ho Xefe Estadu ligadu ho saida mak presiza tenke hadi’a no saida mak tenke hametin, maibé refere liu ba tinan 20 nia laran, labele dehan halo buat sasán hotu loos hotu maibé hanesan ema moris iha tinan 20 nia laran, timoroan sira seidauk iha esperiénsia atu harii Estadu, timoroan halo tiha ona sasán barak.
Nia parte ko’alia nafatin oinsá halo diálogu ho lidér nasionál hotu hodi tuur hamutuk iha konsensu nasionál mezmu iha diferensa sira-ne’ebé mosu durante ne’e.
“Buat hotu ita hatene ona katak iha vontade atu ko’alia ho lidér nasionál hotu-hotu atu bele hetan dalan ida hotu-hotu simu atu hateke ba oin” Nia afirma
Nune’e, nia parte foti inisiativa ona atu halo diálogu maibé situasaun polítika mak la permite no fiar katak iha tempu ona atu tuur hamutuk halo reflesaun hodi hanoin no hateke ba oin, tanba rai ida-ne’e presiza líder sira no rai ida ne’e presiza líder nasionál sira atu hamutuk.
“Ramos Horta horibainrua hataten, nia hakarak ba vizita ha’u iha hau nia edifísiu, ha’u dehan lae, ita-boot mak Prezidente Repúblika nune’eun ha’u mak ba Prezidénsia Repúblika, entaun ha’u mak mai,” nia hateten.
Jornalista : Nelson de Sousa
Editór : Cancio Ximenes
