DILI, POLÍTIKA

PR Horta apresia servisu Canossiana iha Timor-Leste

PR Horta apresia servisu Canossiana iha Timor-Leste

Prezidente Repúblika, José Ramos Horta, hala’o enkontru ho Madre Guilhermina hosi kongregasaun Canosiana iha Palásiu Prezidensiál Nicolau Lobato, Bairru Pite, tersa (09/08). Imajen Tatoli /Egas Cristóvão.

DIlI, 09 agostu 2022 (TATOLI)—Madre Guilhermina Marçal hateten Prezidente Repúblika (PR), José Ramos Horta, apresia servisu madre Canossiana sira iha Timor-Leste.

“Prezidente Repúblika apresia servisu ne’ebé ami halo hanesan prezensa Canossiana iha Timor-Leste halo tinan 143,” Madre Guilhermina Marçal hateten ba jornalista sira hafoin ramata enkontru ho Xefe Estadu iha edifísiu Palásiu Prezidensiál Nicolau Lobato, Bairru Pite, tersa ne’e.

Servisu Canossiana durante ne’e hala’o iha setór edukasaun, saúde, pastorál família, pastorál juvenil, liu-liu katekeze formasaun ba labarik, kazál no servisu sosiál.

“Ida-ne’e atividade sira-ne’ebé ami halo hanesan Canossiana liu-liu hanesan ami nia fundadór dehan katak ha’u tenke sente atan ba maun alin sira servi maun-alin sira ho responsabilidade   ho domin ho respeitu la’ós dehan katak fó de’it sasán maibé oinsá ligasaun ho ema sira-ne’e buat ida haksolok,” nia hateten.

Durante sorumutu Xefe Estadu ho Madre Guilhermina ko’alia mós asuntu sosiál liga ba realidade povu nia moris iha nasaun ne’e hodi diskute oinsá Estadu ne’e bele tau atensaun.

“Ko’alia uitoan kona-ba liu-liu sosiál ba direitu umanu liga ita-nia joven sira, imi hatene realidade ita-nia joven sira ba rai-liur ho kondisaun ne’ebé hanesan Timoroan ida ke sente triste kuandu rona ita-nia joven sira feto mane barak sai ba buka servisu iha rai-li’ur,” nia dehan.

Madre hateten, hanesan relijioza sente triste mós vida sosiál ohin loron bainhira ba fatin balun ne’e ema vulnerável ne’e barak loos tanba haree katak ho COVID-19 depois ho inflasaun mundiál afeta tebes ba ema-nia moris liu-liu ba populasaun ne’ebé laiha rendimentu mínimu.

“Ida-ne’e sai problema boot ba ita, ita lalika ba dook ita ba iha siku sikun sira-ne’e uma hun sira ne’e ita hetan ita-nia maluk sira moris iha ne’eba, liu-liu estudante sira-ne’ebé hela iha kost katak kondisaun mínimu ne’e susar tebe-tebes,” nia dehan.

Nune’e, durante sorumutu ho PR ninia resposta katak sei buka solusaun hamutuk ho parte ezekutivu hodi haree.

Durante sorumutu, Madre Guilhermina mós aprezenta kona-ba nia-parte hola parte iha premiu Luzofonia.

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!