BCTL halo abertura torneiu ba modalidade futsal no volleyball
DILI, 10 agostu 2022 (TATOLI)–Banku Sentrál Timor-Leste (BCTL, sigla portugés) kuarta ne’e, realiza abertura torneiu BCTL CUP 2022 ho modalidade futsal no volleyball.
Governadór BCTL, Abraão de Vasconcelos, hateten, objetivu atividade ne’e hodi komemora aniversáriu ba da-XI ne’ebé sei monu iha loron 13 setembru 2022.
“Ita-nia torneiu BCTL Cup ne’e hanesan atividade animasaun ida ka torneiu kiik ida ne’ebé ita hala’o hodi komemora ita-nia aniversáriu ba dala-XI,” Abraão de Vasconcelos, hateten ba Agência Tatoli iha ponte BJ Habibie, Bidau Lecidere.
Notísia relevante: SEKoop-BCTL fasilita formasaun literasia finanseira ba formandór kooperativa
Orsamentu ne’ebé prevee ba manán-na’in dahuluk sei hetan $1.000, daruak $800 no datoluk ho montante kiik, tanba atividade ne’ebé hala’o hanesan animasaun ida.
Torneiu ne’e aplika de’it ba institusaun finaseiru sira ne’ebé eziste iha Timor-Leste, hanesan banku lima, Kaebauk, no operadór transferénsia.
Torneiu ne’e rasik hahú ohin no sei ramata iha loron 10 setembru molok aniversáriu BCTL.
Jornalista : Arminda Fonseca
Editora : Julia Chatarina
