EKONOMIA, HEADLINE, POLÍTIKA

Enjiñeiru timoroan aprezenta ideia loké indústria ba PR Horta

Enjiñeiru timoroan aprezenta ideia loké indústria ba PR Horta

Prezidente Repúblika, José Ramos Horta, hala'o enkontru ho Enjiñeiru Mekániku, Justino Martins Salsinha, atu kria indústria motor nia travaun no kopling iha Timor-Leste, iha Palásiu Prezidénsiál Nicolau Lobato, Bairru Pite, kuarta (10/08). Imajen Tatoli /Egas Cristóvão.

DILI, 10 agostu 2022 (TATOLI)—Enjiñeiru Mekániku, Justino Martins Salsinha, kuarta ne’e, aprezenta ideia ba Prezidente Repúblika (PR), José Ramos Horta, atu loke indústria prodús motor nia travaun no kopling iha Timor-Leste.

Nia hatutan, obra siéntífiku ne’ebé nia hakerek no públika ona iha jornál siéntífiku internasionál ba área enjiñeiru mekániku liga ho oinsá loké indústria hosi produtivu aluminiu transforma ba motor nia kopling no travaun.

“Matéria ka siénsia ida-ne’e halo ona publikasaun iha jornál siéntífiku no ohin halo aprezentasaun no entrega mós ba Prezidente Repúblika atu nune’e ba oin oinsá dezenvolve iha rai laran,” Justino Martins hateten ba jornalista sira hafoin ramata enkontru ho Xefe Estadu iha Palásiu Prezidensiál Nicolau Lobato, Bairru Pite.

Justino hanesan estudante ne’ebé ramata nia estudu iha Indonézia iha área enjiñeiru mekániku foin mak fila mai ne’ebé hakarek matéria siéntífiku ne’e no durante hakerek halo mós komparasaun ho rai seluk no haree ba produtu aluminiu barak iha Timor-Leste, durante ne’e exporta barak ba li’ur laiha indústria ruma, nune’e ho hanoin ne’e oinsá bele kria mós indústria kiik ruma ne’ebé uza produtu aluminiu hodi transforma ba produtu seluk utiliza iha rai-laran.

Nune’e, tuir planu, hafoin aprezentasaun siénsia ne’e ba Xefe Estadu, nia parte mós iha ona ideia inovativu atu realiza indústria kiik ruma.

Enjiñeiru Mekániku ne’e hateten, ba oin atu hamenus ona aluminiu Timor-Leste labele exporta ba rai-li’ur TL bele halo indústria pengecoran kiik-oan hanesan sana, taxu sira, motor nia kopling no travaun sira-ne’e bele prodús iha Timor-Leste.

“Kona-ba materiál ita-nian iha rai laran barak hanesan lata mamuk (serveza lata), no presiza iha ita-nia rai ne’e karbonu, romiun buat hotu iha soke iha ita-nia rai menus de’it mak siénsia,” nia dehan.

Ho ida-ne’e, nia parte aprezenta ba Xefe Estadu liga ba siénsia ne’ebé iha no planu ba oin sei inisia loké mós indústria.

“Tan ne’e ba oin atu halo uluk mak indústria pengecoran kiik-oan motor nia kopling no travaun sira ne’e. Kona-ba fundu orsamentu hira no fatin ha’u seidauk ko’alia tanba foin aprezenta no tempu ruma sei ko’alia. Maibé se ita primeiru, ha’u kria mákina ida atu nune’e bele fasilita uza ba halo prodús motor nia kopling,” nia informa.

Nune’e, sei halo analiza ba protudu ne’ebé sei prodús no hanoin mós tenke halo publikasaun iha jornál sientífiku hodi kompara ho nasaun sira seluk oinsá materiál Timor-Leste nian di’ak ka lae.

Tanba, merkadu atu kompete la’ós atu faan de’it produtu maibé presiza públika iha jornál siéntifiku bainhira iha universidade hotu-hotu ema bele lee no hatene persentajen sasán produtu ne’e di’ak ka lae no bainhira produtu di’ak ona entaun bele halo komparasaun ho nasaun seluk ema bele hili TL nia produtu no materiál uza iha indústria ne’e di’ak.

Nune’e, planu no dezenvolve matéria ne’e nia parte individuál mak halo oinsá ba oin atu bele dezenvolve no oinsá mós kria kampu traballu ba joven timoroan sira iha rai-laran.

Durante sorumutu ne’e, Xefe Estadu hato’o dezeju susesu ba inisiativa ne’e hodi bele hala’o iha Timor-Leste no bele kria mós kampu servisu ba timoroan sira seluk mós.

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!