Estudante EBC 30 agostu na’in-20 hetan karta xamada
DILI, 10 agostu 2022 (TATOLI)–Eskola Ensinu Báziku Sentrál (EBC, sigla portugés) 30 agostu, Comoro, hasai ona karta xamada ba estudante na’in-20 tanba durante ne’e nunka partisipa iha aula prezensiál.
Diretór eskola EBC 30 agostu, Filomeno Saldanha, hateten, parte eskola hakarak eduka labarik sira atu hatene ninia dever no obrigasaun, tanba ne’e hanesan estudante presiza kumpre regra eskola no partisipa iha aula durante prosesu ensinu aprendizajen hala’o, maibé estudante sira nunka kumpre.
“Ita identifika estudante hamutuk 20 maka durante ne’e nunka partisipa iha aula tanba ne’e ita foti desizaun hodi hasai karta xamada ba sira hodi entrega ba sira-nia inan-aman, katak bainhira sira halo tan maka eskola sei halo prosesu transferénsia,” Diretór eskola informa ba Agência Tatoli, iha eskola 30 agostu, Comoro, kuarta ne’e.
Notísia relevante: Eskola ESJ 04 setembru adia ezame períodu daruak ba estudante 360
Estudante sira ne’e daudaun kontinua partisipa iha ezame períodu daruak, tanba ne’e parte eskola fó ona karta xamada atu ezije prosesu tuir mai, karik hafoin ezame ramata maka sira kontinua halo nafatin hahalok sira hanesan, maka eskola sei foti desizaun muda sira ba eskola seluk.
Aleinde ne’e, Responsável eskola ne’e haktuir, karta xamada ne’ebé eskola fó ba estudante na’in-20 ne’e akompaña mós ho sira-nia deklarasaun katak sira prontu kontribui no obedese ba regra eskola, karik ba oin sira la kumpre maka sei hetan sansaun hodi muda sira ba eskola seluk.
“Ami mós bolu ona inan-aman hosi estudante na’in-20 hodi informa pozisaun eskola, nune’e bainhira mosu desizaun ruma hasoru estudante sira ne’e, inan-aman sira labele hakfodak,” nia tenik.
Estudante hamutuk 2.220 iha eskola ne’e partisipa hotu iha prosesu ezame períodu daruak no estudante sira kompostu hosi 7o ano iha 700, 8o ano iha 720, no 9o ano iha 756.
Jornalista : Tomé Amado
Editora : Julia Chatarina
