DILI, 10 agostu 2022 (TATOLI)–Governu liuhosi reuniaun Konsellu Ministru (KM), kuarta ne’e, aprova projetu rezolusaun Governu, kona-ba kriasaun festival nasionál desportu, ne’ebé aprezenta hosi Ministru Edukasaun Juventude no Desportu (MEJD), Armindo Maia no Sekretáriu Estadu Juventude no Desportu (SEJD), Abrão Saldanha.
“Objetivu kriasaun festival maka atu halibur no hametin populasaun timor-oan ho objetivu selebra atividade desportiva, ho promosaun ne’ebé inerente ba atividade fízika no enkoraja desportu iha sira-nia modalidade, iha planu ba edukasaun fízika iha kategoria desportu nian hanesan tradisionál, rekreativu, inkluzivu no alta kompetisaun,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu, iha Palásiu Governu.
Notísia relevante: PR Horta enkoraja CDTL mellora dezenvolvimentu desportu iha TL
Aleinde ne’e, festival ne’e ho objetivu atu promove hamutuk ho joven sira no populasaun sira seluk, ne’ebé importánsia hosi desportu no atividade fízika, ninia benefísiu sira, ekonómiku, polítiku no iha área saúde públika.
“Eventu ne’e sei sai eventu ne’ebé sei hala’o iha kada tinan, ne’ebé nia estrutura, kalendarizasaun no regra sira sei define tinan-tinan mós hosi Ministériu responsável ba área desportu nian,” Portavoz Governu tenik.
Jornalista : Antónia Gusmão
Editora : Julia Chatarina
