DILI, 10 agostu 2022 (TATOLI)— Ministru Defeza (MD), Filomeno da Paixão de Jesus, informa iha komemorasaun loron FALINTIL dala-47 tinan ne’e, sei partispa hosi Xefe Estadu Forsa Armada hosi nasaun Portugál, Austrália no Indonézia.
“Xefe Estadu Forsa Amada (XEFA) hosi nasaun tolu ne’ebé partisipa komemorasaun loron FALINTIL hanesan hosi nasaun Austrália mak Jenerál Angus John Campbell, hosi Portugál, Almirante António Fernandes Silva Ribeiro no hosi Indonézia mak Jenerál Andika Perkasa,” Ministru Defeza hateten ba Agência TATOLI hafoin reuniaun iha iha Palasiu Governu, Kuarta ohin.
Tuir ajenda Xefe Estadu Forsa Armada (XEFA) hosi nasaun tolu ne’e sei to’o iha Timor-Leste iha loron 18 agostu 2022.
Governante ne’e informa durante sira nia estadia iha Dili, alende partisipa seremónia loron FALINTIL ba dala-48, sei vizita ba fatin balun iha Dili laran no Jardín Eroi Merinaro, Baucau no kari ai-funan iha Portu Dili.
Iha komemorasaun loron FALINTIL ba dala-47 tinan ne’e, Komandu FALINTIL Forsa Defeza Timor-Leste (F-FDTL) maka sai hanesan komisaun organizadora.
Atividade sira ne’ebé prense ba komemora loron FALITIL ba dala-47 t maka, marsa FALINTIL, ne’ebé membru F-FDTL halo hahú hosi suku Lohunu, Mombae, Bibileo to’o iha Cararas-Viqueque ne’ebé hanaran ezersísiu Dalan ba Dame durante loron neen.
Alende ne’e, iha atividade doasaun raan ne’ebé halo hosi instituisaun F-FDTL no atividade jogu hanesan tasa FALINTIL.
Jornalista: Natalino Costa
Editór : Florencio Miranda Ximenes
