OÉ-CUSSE, 10 agostu 2022 (TATOLI) – Autoridade Rejiaun Administrativa Espesiál Oé-Cusse Ambeno (RAEOA) define prioridade hamutuk 16 ne’ebé korresonde ho millaun $120 iha tetu Orsamentu Jerál Estadu (OJE) 2023.
Tetu orsamentu ne’e hetan ona aprovasaun hosi Konsellu Ministru (KM) iha loron 15 juñu 2022. Hosi montante ne’e fahe ba item rua primeiru atu finansia Autoridade RAEOA daruak atu finansia fundu espesiál dezenvolvimentu RAEOA nian ne’ebé fahe ba divizaun ualu.
Divizaun hirak-ne’e mak hanesan, divizaun ba Sekretariu Rejionál ba Asuntu Saúde, Sekretaria Rejionál ba Asuntu Finansa, Sekretaria Rejionál ba Asuntu Komérsiu no Indústria, Sekretariu Rejionál ba Asuntu Terra no Propriedade, Sekretariu Rejionál ba Asuntu Administrasaun.
Nune’e mós Sekretária Rejionál ba Asuntu Edukasaun no Solidariedade Sosiál no Adjuntu Prezidente Autoridade RAEOA na’in-rua, ba asuntu Sosiál no ba asuntu Reforsu Institusionál.
“Orsamentasaun ne’e fahe ba parte importante rua, administrasaun hamutuk millaun $84 no fundu espesiál dezenvolvimentu millaun $36, atu finansia nia programa sira hotu, ita tenke kontinua ba edukasaun, saúde, infraestrutura, agrikultura, sei sai prioridade prinsipál ba ita-nia rejiaun, portu, aeroportu, bee-moos ne’e sai ita-nia foku ba serbisu iha 2023,” Arsénio Paixão Bano, ko’alia bainhira halo ezersísiu ba proposta tetu orsamentu fiskál 2023 iha salaun Alfándega Oé-Cusse, tersa ne’e.
Prezidente Autoridade RAEOA ne’e informa, orsamentu RAEOA tinan ne’e sa’e hosi millaun $84 ba millaun $120, hodi finansia ba serbisu tomak iha RAEOA, ba prioridade ne’ebé maka iha kada Sekretariu Rejionál sira propoin.
“Orsamentu 2023 ne’e atu finansia programa prioridade 16 ho nia sub-programa 100 no atividade hamutuk 349 mak atu hala’o iha tinan oin,” Arsénio afirma.
Nune’e orsamentu ne’e tinan 2023 atu finansia serbisu administrasaun rejionál tomak ho programa atividade foka liu ba povu, tanba serbisu balu importante ba baze dada sentru ba fali sub-rejionál ho suku sira.
Tanba tinan ida-ne’e sei hahú konstrusaun estrada nasionál rua, hosi Pante Makasar ba sub-rejiaun Nítibe distánsia kilómetru 16, no hosi sub-rejiaun Pante Makasar liga ba sub-rejiaun Oésilo ho distánsia kilometru 18, tanba ne’e projetu multi-anuál.
Hosi montante millaun $120 ne’e koloka ba kategoria lima mak hanesan tuir mai ne’e:
Sálariu
Iha kategoria sálariu ne’e ho totál $11,086,859.00, Grande Opsaun Planu 2023 ho montante $12,577,374.96 ba tetu OJE 2023 hamutuk $12,559,985.00.
Bens (sasán) no servisu
Kategoria bens no servisu ne’e ho montante $21,361,440.00, ba Grande Opsaun Planu 2023 ho montante $23,542,618.21, ba tetu OJE 2023 hamutuk $26,078,050.39.
Transferénsia públika
Kategoria transferénsia públika ne’e ho montante $4,410,587.00, ba Grande Opsaun Planu 2023 $6,272,699.33 no ba tetu OJE 2023 hamutuk $5,744,588.52.
Kapitál menór
Iha iha kapitál menór $647,155.00, ba Grande Opsaun Planu 2023 ho montante $5,776,932.00 no ba tetu OJE 2023 hamutuk $3,556,752.00.
Kapitál dezenvolvimentu
Kapitál dezenvolvimentu RAEOA nian ba tinan fiskál OJE 2023 ho montante $52,059,303.00, Grande Opsaun Planu 2023 hamutuk $82,163,918.80 no ba tetu OJE 2023 hamutuk $72,061,624.09.
Nune’e totál OJE 2023 millaun $89-resin ($89,565,344.00) prevista iha Grande Opsaun Planu OJE 2023 hamutuk $130, 333,543.30, no iha tetu OJE 2023 hamutuk $120,000,000,00.
Jornalista : Abílio Elo Nini
Editór : Evaristo Soares Martins
