HEADLINE, SAÚDE

Semana ne’e, Klínika Bairru Pité hahú reativa funsionamentu sala maternidade

Semana ne’e, Klínika Bairru Pité hahú reativa funsionamentu sala maternidade

Jestór Klínika Bairru-Pité, Inácio dos Santos. Imajen Tatoli/Felicidade Ximenes.

DILI, 10 agostu 2022 (TATOLI)— Diretór Ezekuitvu Klínika Bairu-Pité, Inacio dos santos, informa, iha inísiu fulan fevereiru tinan ne’e, klínika ne’e deside taka provizóriu ba sala maternidade inklui tratamentu ba pasiente má nutrisaun tanba hasoru situasaun krize finaseiru.

Maibé, Responsavél ne’e dehan, iha ona apoia orsamentu hosi Ministériu Saúde ho montante $68.110, nune’e semana ne’e, hahú reativa fali atendementu saúde ba públiku liuliu inan-isin rua sira ne’ebe hakarak mai partu  iha sala maternidad.

Notísia relevante:  Klínika Bairru Pité Hahú Taka Uluk Sala Baixa no Maternidade

“Durante ne’e, ita taka sala materidade ba públiku tanba ita enfrenta problema finanseiru, maibé ita hakarak semana ne’e loke fila-fali para inan sira ne’ebé mak hakarak partu mai bele mai iha iha sala maternidade hodi hetan asisténsia saúde,” Diretór Ezekuitvu ne’e hateten ba Agência TATOLI iha kna’ar fatin-Dili, kuarta ne’e.

Klínika Bairru-Pité asina nota Ministériu Saúde hodi apoia orsamentu $68.110, nune’e transfere ona $27.220 no hein tan faze daruak ho montante $40.890.

“Ami mós asina ona memoradu ho Gabiente Apoiu Sosiedade Sívil no Auditoria Sosiál ba tinan 2022 to’o 2023 nian hamutuk $150.000 atu ami nia ativiadade liuliu normaliza hikas atendimentu saúde hotu iha tinan oin nian,” nia afirma.

Resposavél ne’e dehan ho apoia orsamentu hirak ne’e hahú hanoin atu re-ativa fazeadamente ba sala baixa, tratamentu nutrisaun no mós servisu sosiál saúde ba feto.

“Sé ita hakarak reativa hotu Departamentu nutrisaun sala baixa no mós servisu sosiál saúde ba feto sira ne’e kada tinan ita presiza orsamentu $258.000,” nia afirma.

Diretór ne’e mós hato’o agradesementu ba kontribuisaun populasaun nia hotu hodi reativa hikas funsionamentu sala maternidade.

“Ita nia populasaun barak mak mai husu atu loke sala maternidade no sira prontu atu kontribui ba funsionamentu no kontinua husu Governu no ema hotu ajuda klínika ne’e atu kontinua fó atendimentu saúde públiku,” nia afirma.

Funsionáriu ka pesoál saúde ne’ebé serbisu iha klínika ne’e hamutuk 70, maibé ho krize finanseiru konsege hapara provizóriu pesoál na’in-30, hela de’it pesoál saúde 40.

Notísia relevante:  Pasiente sira hahú halo kontribuisaun ba Klínika Bairru-Pité

Jornalista : Felicidade Ximenes

Editór         : Florencio Miranda Ximenes

iklan
iklan

Leave a Reply

iklan
error: Content is protected !!