EDUKASAUN, HEADLINE, MUNISÍPIU, VIQUEQUE

Servisu Edukasaun Viqueque rejista kandidatu finalista ezame nasionál na’in-3.296

Servisu Edukasaun Viqueque rejista kandidatu finalista ezame nasionál na’in-3.296

Ilustrasaun ezame. Imajen/Espesiál

VIQUEQUE, 10 agostu 2022 (TATOLI)-Diretór Servisu Edukasaun munisípiu Viqueque, Emídio Amaral, informa, lista kandidatu finalista ezame nasionál munisípiu Viqueque hamutuk 3.296.

“Lista kandidatu atu partisipa iha ezame nasionál tinan 2022 ne’e entrega ona ba nasionál hodi parte kurríkulu bele haree estudante kandidatu sira-nia naran. Naran finalista hosi Viqueque ami hatama ikus mak tersa semana kotuk, nune’e sira bele partisipa ezame nasionál iha fulan oin,” Diretór Servisu Edukasaun munisípiu Viqueque hateten ba Agência Tatoli, iha ninia knaar fatin, Beloi, kuarta ne’e.

Notísia relevante: Estudante sekundáriu Santo Estevão Viqueque na’in-111 preparadu partisipa ezame nasionál

Profesór sira iha eskola Viqueque daudaun prepara hela matéria ba estudante atu hasoru ezame nasionál.

“Ha’u husu estudante ne’ebé tinan ida-ne’e hanesan kandidatu atu tuir ezame nasionál, tenke estuda didi’ak atu hetan valór di’ak. Tanba iha tinan ida-ne’e estudante sira ne’ebé hetan valór di’ak Governu sei fó subsídiu hodi hala’o estudu iha universidade sira iha rai-laran no Governu maka sei selu. Estudante sira haka’as-an estuda hodi hetan valór di’ak,” nia enkoraja estudante finalista sira.

Tuir dadús, estudante finalista iha munisípiu Viqueque iha eskola ensinu báziku sentrál (EBC, sigla portugés) hamutuk 1.897, sekundáriu hamutuk 1.306 no eskola tékniku vokasionál hamutuk 96.

Jornalista   : Vitorino Lopes da Costa

Editora        : Julia Chatarina

iklan
iklan

Leave a Reply

iklan
error: Content is protected !!