DILI, HEADLINE, POLÍTIKA

Governu iha esforsu dezenvolve posu mina iha rai-maran no setór produtivu

Governu iha esforsu dezenvolve posu mina iha rai-maran no setór produtivu

Timor Resources halo perfurasaun iha rai-maran iha posu Feto Kmaus, Covalima. Imajen TATOLI/Celestina Teles

DILI, 11 agostu 2022 (TATOLI)—Primeiru-Ministru (PM), Taur Matan Ruak, hateten Governu iha esforsu rua hodi dezenvolve posu mina iha rai-maran no diversfika setór produtivu iha rai-laran.

Notísia Relevante: Xefe Kaza Sivil husu Governu apoiu grupu produtivu iha munisípu

Primeiru-Ministru, Taur Matan Ruak. Imajen Tatoli/Francisco Sony

“Ita iha esforsu rua atu halo. Ida mak ita buka alternativa seluk sein ser Greater Sunrise. Se ita-boot sira haree halo iha Suai fura mina matan tolu ona, ida ita taka tiha ona laiha maibé rua potensiál. Aleinde ne’e, parte seluk hanesan iha Same iha fatin tolu ne’ebé agora sira prepara loos bele hahú halo perfurasaun,” PM Taur hateten ba jornalista sira hafoin ramata enkontru semenál ho Prezidente Repúblika, José Ramos Horta, iha Palásiu Prezidensiál Nicolau Lobato, Bairru Pite, kinta ne’e.

Xefe Governu dehan, aleinde Timor-Leste iha bloku sira seluk faan ona, bele tinan ida ka rua preparativu naturalmente iha proximu tinan tolu iha atividade intensifika makaas kona-ba área petrolíferu ninian.

“Aleinde ne’e Timor Gap Empreza Públika mós iha ninia eskluzivu ida, plaka ne’e parte petrolíferu ninian no parte mineral ita kria tiha ona empreza minerál provavelemente, ida-ne’e ba oin atividade bele komesa ona,” nia dehan.

Iha tinan ida-ne’e, primieravés Governu tama iha área setór produtivu liu-liu setór primáriu área agrikultura hanesan kafé.

Governu tau matan ho apoiu Prezidente Repúblika nian hanesan ema hotu haree kafé nian de’it halo tiha ona lansamentu inisiál ho prezensa Prezidente Repúblika nian.

“Governu follow up iha tersa kotuk ne’e se lasala ha’u ho ministru, tékniku, diretór sira no reprezentante Kaza Sivíl Prezidénsia Repúblika ba partisipa hotu haree opiniaun hosi empreza, asosiasaun, kooperativa, agrikultór sira sira-nia opiniaun. Aora dokumentasaun ami analiza hela baze aprezentasaun, tuir mai parte téknika de’it haree saida mak ita tenke halo liu-liu Governu nia parte,” nia hateten.

Nia dehan, foin daudaun komunidade Ermera levanta mak reabilitasaun kafé no Governu tau osan boot kuaze millaun $6.7 hodi halo reabilitasaun ba kafé ektare rihun 10.

“Sira tau problema rua ida se ida halo reabilitasaun ba kafé ektare rihun 10 ne’e signifika ita redús iha produsaun agora. Segundu, kapasidade ita-nia ba reabilita ektare rihun 10 ne’e ita laiha, Ministéiru Agrikultura nia másimu 500 no mínimu ne’e 100 tinan ida. Agora, ektare 10 liu ba tinan ida de’it ne’e imposivel, entaun tenke halo ezersísiu ida oinsá mak progresivamente tenke halo,” nia hateten.

Aleínde ne’e, PM Taur dehan problema seluk levanta mak kona-ba estrada, mudansa klimátika bele influénsia produsaun kafé nian no problema seluk mak joven sira halai hotu mai Dili no fatin seluk so’e hela katuas-ferik mak sa’e kafé labele ona, entaun hadi’a kafé ladi’ak rezolve problema ne’e halo nusa.

Kona-ba ideia Prezidente Repúblika atu kria fundu kafé, parte Governu seidauk ko’alia maibé tempu oin sei diskute.

“Prezidente Repúblika lansa ideia kria fundu kafé maibé ami seidauk diskute, ne’ebé ami haree uluk lai hodi halo intervensaun ba buat ki’ik depois ita ba iha parte boot ne’e. Maibé asuntu ne’e ami sei haree (kriasaun fundu kafé) hodi bele diskute hotu, se posivel karik halo oinsá intervensaun Governu iha ne’ebé. Tanba setór produtivu saida mak ita tenke halo dada setór privadu makaas liután,” Xefe Governu ne’e adianta.

Tanba Governu jere no ajuda kontribui maibé la’ós Governu mak tenke asume responsabilidade hotu-hotu, nune’e setór produtivu tenke envolve setór privadu no setór kooperativa depois aban-bainrua hanoin setór estatál.

Notísia Relevante: Timor-Leste presiza investe iha setór produtivu

Jornalista : Nelson de Sousa

Editór      : Cancio Ximenes

iklan
iklan

Leave a Reply

iklan
error: Content is protected !!