Governu indika Fidélis-José Lucas partisipa serimónia investidura kardeál iha Vatikanu
DILI, 11 agostu 2022 (TATOLI)–Ministra Negósiu Estranjeiru no Kooperasaun (MNEK), Adaljiza Magno, hateten Governu indika governante na’in-rua hodi partisipa iha serimónia investidura ba eleitu kardeál timorense, Don Virgílio do Carmo da Silva, SDB, iha Vatikanu, Roma, iha 27 agostu tinan 2022.
Notísia Relevante: Don Virgílio do Carmo da Silva, Kardeál dahuluk Uma Kreda Timor-Leste
“Primeiru-Ministru indika ona governante na’in-rua hanesan Ministru Presidénsia Konsellu Ministru, Fidélis Leite Magalhães no Ministru Turizmu Komérsiu no Indústria, José Lucas, atu partisipa iha serimónia ne’e,” Governante ne’e hateten ba Agência Tatoli, iha edifísiu East Timor Development Agency (ETDA-sigla inglés), Fatuhada, Dili.
Governante ne’e hateten, nia parte seidauk hatene bainhira mak governante na’in-rua ne’e dezloka ba Roma ne’e husu direta ba governante na’in-rua ne’e.
Nune’e mós, Vise-Prezidente Parlamentu Nasionál (PN), Luís Roberto da Silva, hateten meza PN mós deside ona deputadu na’in-haat mak sei partisipa asembleia kardeál foun iha Vatikanu.
“Membru PN mak Vise-Prezidente PN, Maria Angelina Sarmento, segundu Vise-Prezidente, Luís Roberto da Silva, Sekretária Meza, Lídia Norberta dos Santos no segundu Sekretáriu meza, Regina Freitas,” nia dehan.
Nia hatutan, kardeál eleitu Don Virgílio do Carmo da Silva, SDB, sei aranka ba Roma iha loron 22 agostu 2022 atu simu bensaun hosi Papa Francisco.
Notísia Relevante: PM parabeniza Don Virgílio simu kargu sai Kardeál dahuluk iha Timor-Leste
Jornalista : Osória Marques
Editór : Cancio Xiemenes
