EKONOMIA, HEADLINE

Governu introdús kadeia valór kafé ba promosaun no insentiva produsaun nasionál

Governu introdús kadeia valór kafé ba promosaun no insentiva produsaun nasionál

Plantasaun Kafé iha munsípiu Ainaro, domingu (15/05). Imajen Tatoli/Francisco Sony

DILI, 11 agostu 2022 (TATOLI)—Komisaun Interministeriál ba Koordenasaun Kadeia Valór no Estímulu Produsaun Lokál (CI-CCVEPL, sigla portugés) hala’o workshop kafé dahuluk ba konsultasaun nasionál kona-ba sosializa ba dezafiu no oportunidade iha dezenvolvimentu kadeia valór ba kafé hosi fini to’o xikra.

Atividade ne’e hala’o iha tersa (09/08), iha postu administrativu Railaco, munisípiu Ermera, hafoin aprovasaun reuniaun Konsellu Ministru liuhosi rezolusaun Governu númeru 20/2022, 18 maiu 2022, ne’ebé estabelese CI-CCVEPL atu promove no estimula produsaun lokál, fó baze ba asegura auto-sufisiensia no soberania nasionál.

“Objetivu hosi kadeia valór ne’e mak ba parseiru prinsipál sira ne’ebé iha relasaun ho asuntu promosaun no insentiva ba produsaun nasionál, espasu ida atu halibur entidade sira ne’ebé iha relasaun ho asuntu kafé hahú hosi Governu, setór privadu, parseiru dezenvolvimentu, asosiasaun kafé sira no kafe kultór atu sosializa konseitu no objetivu hosi vadeia valór,” Primeiru-Ministru no Prezidente CI-CCVEPL, Taur Matan Ruak, hateten, liuhosi nota komunikadu Agência Tatoli asesu, kinta ne’e.

Notísia relevante: Governu kria komisaun inter-ministeriál koordena kadeia valór-estímula produsaun lokál

Prezidente CI-CCVEPL konsidera presiza sosializa konseitu no objetivu hosi kadeia valór ba parseiru prinsipál sira tanba iha relasaun ho asuntu promosaun no insentiva ba produsaun nasionál, programa reabilitasaun kafé no hetan idea hosi parseiru sira kona-ba abordajen di’ak ba susesu programa inklui fahe esperiénsia entre parseiru sira ne’ebé susesu ona ho programa reabilitasaun kafé, promove merkadu justu ba kafé iha rai-laran no rai-li’ur.

Timor-Leste nia produtividade kafé menus no kiik liu, tuir rezultadu degradasaun beibeik kada tinan tanba jerasaun agora la kuda kafé.

“Se ita-boot sira haree durante tinan-20 agrikultór sira mak ho esforsu tomak fó kontribuisaun iha setór produtivu, tinan ida-ne’e, Governu tau milliaun $50 atu atrai setór privadu tama mai iha setór produtivu atubele kontribui aumenta produtividade hodi responde ba ita-nia merkadu interna,” nia akresenta.

Nune’e, iha área sira seluk bele hadi’a kualidade, presu, fó benefísiu ba agrikultór sira ne’ebé bolu kréditu suave 3% iha médiu to’o mikru, kréditu hahú hosi $1.000 to’o $250.00, grande empreza hosi $250.000 to’o millaun $1.

Governu hakarak redús importasaun

Aleinde ne’e, Governu iha esforsu rua ne’ebé atu implementa, hanesan kombate dependénsia signifika atu aumenta produsaun hodi redús importasaun no aumenta volume esportasaun produtu rai-laran hodi hasa’e reseita nasaun.

“Ha’u hanoin hafoin tinan-20 ita avansa fali ona setór ekonomia bázikamente, iha kestaun ne’e iha buat tolu ne’ebé ita presiza hanesan kapitál tanba kapitál laiha, dezenvolvimentu ekonomia laiha, Governu jere no define polítika, kria ambiente atu negósiu sira la’o, dezenvolvimentu ekonomia mós la’o, maibé la’ós Governu mak dudu ekonomia ba oin, maibé ita-nia baze ekonomia ne’e iha kombinasaun setór importante tolu hanesan setór estatál, setór privadu no setór kooperativa,” nia tenik.

Xefe Governu agradese ba kafe kultór kompostu hosi grupu no asosiasaun sira ne’ebé dedika sira-nia an hodi tau-matan ba kafé no parseiru dezenvolvimentu sira ne’ebé investe sira-nia tempu no rekursu sira ba setór kafé.

Governu prontu atu apoiu setór privadu, kooperativa, grupu kafe kultór no parseiru dezenvolvimentu sira kona-ba esforsu atu hadi’a kualidade no produtividade kafé.

Iha Workshop ne’e, Aprezentadór Xisto Moniz Piedade aprezenta maioria hosi aprezentadór sira aprezenta sira-nia programa kona-ba reabilitasaun no re-plantasaun kafé, formasaun ba kafekultór sira inklui dezafiu sira kona-ba produtividade kafé tuun tanba idade kafé sira liu ona tinan-50.

“Kooperativa kafé Timor hala’o ona reabilitasaun kafé hamutuk hun 9.341.540, plantasaun 31.539, ho totál ektare 11.547 entre tinan 2008 to’o 2022, ho rezultadu kafé ne’ebé hetan reabilitasaun ho nia produtividade kilograma 2.000/ektare no la reabilita atinje de’it kilograma 600/ektare,” Xisto Moniz Piedade, hateten iha nia aprezentasaun.

Iha aprezentasaun, maioria aprezentadór sira hato’o sujestaun no rekomendasaun ba Governu atu apoiu organizasaun sira no parseiru dezenvolvimentu atu halo viveiru kafé to’o nível aldeia, formasaun adekuadu kona-ba reabilitasaun no re-plantasaun, promove agrikultura integradu, peskiza hosi universidade sira, intervensaun merkadu, no apoiu setór privadu sira hodi investe iha indústria kafé.

Komisaun interministeriál ne’e prezide hosi Primeiru-Ministru no apoia hosi Ministru Koordenadór Asuntu Ekonómia (MKAE), Ministru Turizmu, Komérsiu no Indústria (MTKI), Ministru Agrikultura no Peska (MAP), Ministru Finansa (MF), no Ministru Obra Públika (MOP).

Antes ne’e, loron 09 jullu 2022, órgaun soberania haat hanesan Prezidente Repúblika, Governu, Parlamentu Nasionál, Tribunál Rekursu no entidade importante hotu marka prezensa iha munisípiu Ermera hodi halo diálogu ho komunidade ho tópiku ‘Reflorestasaun Kafé Timor, Hadomi Kafé, Kafé mak Ita-nia Kultura’.

Prezidente Repúblika rekomenda estabelese fundu kafé

Iha diálogu ne’e, Prezidente Repúblika, José Ramos-Horta rekomenda ba Governu atu aloka ‘Fundu ba Kafé’, ida-ne’e indikasaun pozitivu tanba hahú ona fó importánsia ba asuntu dezenvolvimentu kafé.

Atu sustenta inisiativa ida-ne’e, Governu hola responsabilidade tomak hodi mobiliza rekursu ba susesu reflorestasaun kafé, nune’e bele hasa’e produsaun kafé iha rai-laran ba sustenta ekonómia populasaun, nune’e mós kontribui rendimentu maizumenus 90% ba populasaun ne’ebé moris ho setór kafé ka kontribui maizumenus 25% hosi populasaun Timor-Leste.

Timor-Leste iha vizaun no misaun atu kafé nu’udar produtu lukrativu no sustentável hodi kontribui ba melloradu meiu subsisténsia, seguransa ai-han no kresimentu ekonomia, no mós kafé ne’ebé kualidade ba produsaun no prosesamentu hodi asesu ba merkadu premium tantu rejionál no mundiál.

Nune’e mós, tuir meta kuantitativa atu hasa’e kualidade no produtiva hodi atinje duplikasaun produsaun tonelada 20.000, aumenta persentajen venda iha nível presu espesiál no premium, no aumentu valór esportasaun to’o 270% anuál to’o tinan 2030 (planu dezenvolvimentu nasionál setór kafé tinan 2019-2030,).

Oradór iha workshop ne’e mai hosi Exelénsia Xefe Gabinete Primeir-Ministru, MAP, Banku Dezenvolvimentu Aziátiku, Cooperativa Café Timor, Asosiasaun Kafé Timor, PARCIC, PEACE WIN JAPAN, YMCA Timor-Leste, OLAM Timor-Leste.

Nune’e, Kooperativa Multi Sectoriál Unidade Kafé Nain Maubisse, no kafe kultór hosi munisípiu Aileu, Ainaro, Bobonaro, Ermera, Liquiçá, Manatuto, Manufahi, no partisipante kompostu hosi Embaixadór Nova Zelándia, parseiru dezenvolvimentu, autoridade munisípiu no lokál hosi Aileu, Ainaro, Ermera, Liquiça, Manatuto no Manufahi, diretór liña ministeriál, reprezentante Polísia Nasionál (PNTL), FALINTIL-Forsa Defeza Timor-Leste (F-FDTL), no kafe kultór sira.

Jornalista   : Arminda Fonseca

Editora        : Julia Chatarina

iklan
iklan

Leave a Reply

iklan
error: Content is protected !!