Governu presiza reabilita kondisaun infraestrutura iha Bee-Manas Marobo
BOBONARO, 11 agostu 2022 (TATOLI)–Administradór postu administrativu (APA) Bobonaro, Juvinal Leto-Mau dos Santos, husu Ministériu Turizmu, Komérsiu no Indústria (MTKI) atu halo reabilitasaun ba kondisaun infraestrutura iha sítiu turístia Bee-Manas Marobo ne’ebé lokaliza iha suku Ila-Laun.
Notísia relevante: SEFOPE sei koordena MTKI reabilita infraestutura bee-manas Marobo
“Ha’u hanoin governu presiza reabilita tanba ha’u halo observasaun nota uma sira-ne’ebé mak konstrui iha governu liubá ne’e to’o agora la funsiona, ai-kabelak sira nahe atu ema la’o no fatin troka sira-ne’e dodok hotu, depois besi mos furujen hotu ona, atu dehan de’it agora kondisaun grave totál,” nia ko’alia iha edifísiu administrasaun munisípiu Bobonaro, kinta ne’e.
Nia dehan, infraestrutura bázika sira-ne’e la’ós komunidade ka vizitante sira mak estraga, maibe ai-kabelak sira-ne’ebé latan iha dalan ne’e mak kualidade ladún di’ak no besi sira-ne’e ferujen hotu tanba la tahan ho Bee-Manas.
“Ha’u ba kaer rasik no koko, besi sira-ne’e kuandu ita silu nia sai rahun hanesan biskuit, tanba ne’e mak lia-na’in sira ami kuandu hasoru malu iha fatin ne’e, sira hateten, karik ba futuru planu governu atu reabilita karik, labele uza besi, ne’e tenke uza de’it materiál lokál hanesan ai ne’ebé kualidade,” nia sujere.
Autóridade postu ne’e fó hanoin ba governu katak, ba oin bainhira iha ona planu atu halo reabilitasaun, presiza mós konstrui fatin ba negosiante sira nune’e bele fa’an produtu lokál no prepara ai-han ruma bainhira vizitante lokál no estranjeiru sira presiza.
Kona-bá kondisaun estrada liga hosi suku Ilat-Laun ba Bee-Manas Marobo dadaun ne’e di’ak hela, vizitante sira bele asesu ba kedas to’o sítiu ne’e tanba iha tinan hirak liubá projetu hosi International Labour Organization (ILO) hadi’a ona dalan ne’ebé grave.
Maibe foin lalais akontese udan bot mak rezulta bee ho volume bo’ot konsege sobu estrada balun kuaze metro 10 resin.
“Nia hanesan Tohar oituan deit,maibe provizoriumente ema bele asesu,tamba komunidade sira hela besik ne’e maoria faan Lís no proudutu lokál liu iha dalan ne’e,entaun sira hola inisiativa rasik,ense rai ho fatuk halo diak fali”Nia dehan
Enkuantu Bee-Manas Marobo ne’ebé lokaliza iha foho Ilat Laun nia hún, iha munisípiu Bobonaro hori uluk kedas rekoñese nu’udar fatin destinasaun turístiku ho nune’e Sekretaria Estadu Polítika Formasaun Profisionál no Empregu (SEFOPE) liuhosi projetu Turizmu Komunitária reabilita no moderniza ona infrastrutura bázika hosi ninia orijinalidade.
Bee-Manas Marobo reaiblita hosi Sekretáriu Estadu Formasaun, Profesionál no Empregu (SEFOPE), Ilídio da Costa Ximenes iha 2015 ho totál kustu $498,860 no inagura iha loron 08 dezembru 2016 hosi Ministru Planeamentu no Investimentu Estratéjiku, Kay Rala Xanana Gusmão.
Notisia Relevante:Infraestrutura bázika iha Bee-Manas Marobo la funsiona
Jornalista: Sérgio da Cruz
Editór: Evaristo Soares Martins
