Janeiru-jullu: BTL, E.P Covalima kontribui reseita $2,529 ba kofre Estadu
COVALIMA, 11 agostu 2022 (TATOLI)—Ofisiál Finansa Bee Timor-Leste, Empreza Públiku (BTL, E.P) Covalima, Norberto Amarál Barros, informa hosi fulan-janeiru to’o fulan-jullu tinan ne’e, BTL, E.P kontribui ona reseita $2,529 ba kofre Estadu.
“Janeiru to’o jullu ne’e, BTL, E.P kontribui ona reseita $2,529 ba kofre Estadu liuhosi fonte reseita halo ligasaun foun hamutuk $ 1,910 no aplika multa ba kompañia ne’ebé estraga besi iha Orun ne’e selu multa hamutuk $6,29.60,” Norberto Amarál Barros hateten ba jornalista sira, iha nia servisu fatin, Sukaer Laran, kinta ne’e.
BTL, E.P kontribui reseita ne’e liuhosi komunidade ne’ebé halo ligasaun bee-moos foun ne’ebé selu ho osan $55,00 no mós aplika multa ba kompañia ne’ebé estragu besi.
Ho nune’e, osan ne’ebé mak komunidade selu la’ós selu direta ba BTL, E.P maibé selu iha Banku Nasionál Comersio Timor-Leste (BNCTL) hafoin BTL, E.P simu de’it resivu hodi halo instalasaun.
Antes ne’e, iha loron 02 agusto tinan ne’e, Koordenadór BTL, E.P fó sai dadus katak populasaun hamutuk 1,665 mak asesu ona bee-moos iha ára urbana.
Notísia Relevante:
Jornalista : Celestina Teles
Editór : Cancio Ximenes
