Klínika Bairru Pité kontinua rejista pasiente tuberkoluze no HIV/SIDA
DILI, 11 agostu 2022 (TATOLI)— Klínika Bairru-Pité kontinua rejista no fó atendimentu saúde pasiente tuberkoluze no HIV/SIDA.
Tuir dadus hahú hosi janeiru to’o jullu pasiente ne’ebé rejista pasiente na’in-300-resin, hosi númeru ne’e munisípiu tolu hanesan Dili, Ermera no Bobonaro mak númeru pasiente barak liu.
Notísia relevante: Semana ne’e, Klínika Bairru Pité hahú reativa funsionamentu sala maternidade
Iha tinan kotuk, klínika ne’e mós rejista pasiente tuberkoluze na’in-432, kompostu na’in-200 resin hosi munisípiu Dili 200-resin, Ermera 53, Bobonaro 32 no restu mai hosi munisípiu seluk.
Hahú hosi janieru to’o jullu, klínika ne’e mós rejista pasiente foun HIV/SIDA hamutuk 17 ne’ebé afeta maioria ba joven sira idade 20 to’o 40.
Ho nune’e, Diretór Ezekutivu Klínika Bairru Pité, Inacio dos santos hateten klínika ne’e kontinua rejista pasiente ho moras tuberkoluze (TBC) no HIV/SIDA ho númeru ne’ebé aas.
“Ita haree númeru tuberkoluze no HIV-SIDA tanba populasaun no joven sira sei menus koñesimentu ba moras hirak ne’e, Maske pesoál saúde sira nafatin fó sensibilzasaun informasaun ba komunidade sira bainhira iha sintoma ruma ba lalais fasilidade saúde hodi hetan atendimentu hosi médiku sira,” Diretór ne’e dehan ba Agência TATOLI iha knaar fatin, kinta ne’e.
Ministériu Saúde liuhosi Pesoál Saúde no Institutu Nasionál Kombate HIV/SIDA kontinua esforsu maka’as halo sensibilizasaun no rasteiru ba komunidade no joven sira hotu kona-ba moras tuberkoluze, HIV-SIDA, epatite B, Sífilis hodi hamutuk kombate moras hirak ne’e.
Iha tinan 2021, pesoál saúde sira halo rasteriu ba uma-kain 666 iha suku Bairru-Pité, hosi totál konsege halo rasteriu ba populasaun purvolta 3.000-resin. Hosi númeru ne’e deteta pozitivu tuberkoluze iha uma-kain 17 ho totál ema afetadu 90-resin.
Nune’e, pasiente TB ne’ebé baixa iha izolamentu Tibar hamutuk 40-resin liuliu sira ne’ebé mai hosi munisípiu sira.
Iha tinan 2020 to’o 2021, programa ida ne’e suporta hosi Gabiente Sosiedade Sivil Gabinete Primeiru Ministru ho orsamentu montante $20.000-resin hodi halo atividade liuliu rasteriu ba komunidade sira.
HIV/SIDA
Hahú hosi janieru to’o jullu, klínika ne’e mós rejista pasiente foun HIV/SIDA hamutuk 17 ne’ebé afeta maioria ba joven sira idade 20 to’o 40.
Enkuantu, tuir dadus hahú iha tinan 2003 to’o marsu 2022 Estadu Timor Leste liuhusi Institutu Nasionál Kombate HIV/SIDA rejista ema ho HIV/SIDA hamutuk 1.582 husi númeru ne’e na’in 278 mak mate.
“Ha’u preokupa ho joven sira tanba sira idade ne’ebé mak ki’ik no koñesimentu menús, maibé halo relasaun seksuál ne’e mak hetan afetadu maka’as,” nia preokupa.
Nune’e, Diretór ne’e husu ba ema hotu atu halo relasaun seksuál la’ós ho parseiru tenke utuliza protesaun atu labele hetan transmisaun moras HIV-SIDA.
“Ita mós detekta labarik minoridade na’in lima, kompostu mane rua no feto tolu ne’ebé hetan HIV/SIDA tanba transmisaun hosi inan-aman sira,” nia afirma.
Iha tinan 2021 to’o 2023, programa ne’ebé mak Klinika Bairru-Pité hala’o ne’e hetan apoia hosi Divisaun Fundu Globál iha Ministériu Saúde atu foku liubá halo sensibilizasaun informasaun ba estudante sira no mós ba munisípiu sira hanesan Bobonaro no Covalima.
Notísia relevante: Jullu, Klínika Bairru Pité rejista pasiente ISPA na’in-353
Jornalista: Felicidade Ximenes
Editór : Florencio Miranda Ximenes
