Top

Konstrusaun uma veteranu 20-24 seidauk finaliza tanba foin konklui uma hitu

Uma foun ba Veteranu Filipe Belo ‘Rai-lakan’, iha suku Wenunuk, postu Metinaro. Imajen TATOLI/Francisco Sony.

DILI, 11 agostu 2022 (TATOLI)–Sekretáriu Estadu Asuntu Kombatente Libertasaun Nasionál (SEAKLN), Júlio da Conceição “Loro Mesak”, hateten konstrusaun uma veteranu 20-24 seidauk finaliza tanba foin mak konklui uma hitu (7).

Notísia Relevante: MAKLN seidauk bele halo fiskalizasaun ba konstrusaun uma veteranu 20-24

Mesmu konstrusaun ba veteranu 20-24 ba tinan ne’e tama ona faze datoluk nian maibé seidauk finaliza hotu, tanba uma hitu ne’e konklui no entrega ona ba na’in iha munisípiu Manufahi- Same nian, Metinaro, Baucau, Liquiça no seluk tan.

“Seidauk konklui hotu tanba kestaun rai, nune’e veteranu 20-24 labele konstrui uma tanba nune’e foin mak Governu entrega uma hitu (7) ba nia na’in mak iha Metinaro, Same, Baucau, Liquiça no seluk tan,” nia dehan ba Agência TATOLI, iha nia knar fatin Caicoli, Dili.

Uma seluk ne’e, nia dehan, seidauk finaliza tanba iha razaun oioin katak balun rai laiha, depois iha balun hela área rurál maibé sira lakohi halo uma iha ne’ebá no hakarak halo uma iha vila maibé rai laiha.

“Entaun ho buat hirak-ne’e hotu prejudika ba halo uma maske Estadu liuhosi Governu transfere ona osan ba kada veteranu nia konta bankária ho montante $40,000,” nia dehan.

Antes ne’e, Ministru ba Asuntu Kombatente no Libertasaun Nasionál, Júlio Sarmento da Costa ‘Meta Mali’, informa Governu sei harii uma ba veteranu ne’ebé kompleta tinan 20 to’o 24 luta ba libertasaun nasionál kada etapa.

“Ami foti etapa tolu, etapa dahuluk iha tinan 2020, etapa daruak iha tinan 2021 no etapa ikus iha tinan 2022, ” nia dehan.

Objetivu kontrusaun uma ba veteranu atu dignifika sira-nia dedikasaun, ne’ebé bainhira funu hotu iha tinan 1999, fila mai vila laran laiha fatin hodi hela, tanba ne’e Governu halo programa hodi konstrui uma.

Antes nee prevee orsamentu ba konstrusaun uma veteranu hamutuk 60 ne ebé korresponde ho totál orsamentu millaun $ 2,4 malbé ikus mai aumenta ba uma hamutuk 96

Jornalista : Osória Marques

Editór     : Cancio Xiemenes

Publisidade

Leave a Reply

Latest Post

error: Content is protected !!