MAE disemina lei poder lokál-lei eleisaun munisipál ba autoridade Covalima
COVALIMA, 11 agostu 2022 (TATOLI)–Ministériu Administrsaun Estatál (MAE) liuhosi Dirasaun Unidade Asesoria Tékniku (UAT) no Sekretáriu Apoiu Instalasaun Munisípiu (SAIM) hala’o diseminasaun lei podér lokál, lei eleitorál munisipal no segunda alterasaun liga ba divizaun administrativa ba autoridade iha Covalima.
“Atividade ohin loron liga ba diseminasaun kona-ba lei podér lokál no desentralizasaun administrativa númeru 23/2021, lei eleitorál munisipál númeru 2/2021 no mós lei seluk ne’ebé sai komplementár ba diseminasaun ida-ne’e mak segunda alterasaun ba lei númeru 11/2009 liga ba divizaun administrative,” Francisco da Silva Guterres informa ba Agência Tatoli, iha salaun administasaun munisípiu Covalima, kinta ne’e.
Razaun Governu disemina lei tolu ba autoridade Covalima tanba bainhira Governu implementa lei refere ne’e autoridade sira entende ona konteúdu hosi lei refere, nune’e fasil ba sira atu implementa.
“Ita transmite ba malu, nune’e funsionáriu hotu tantu kargu xefia no lideransa-sira nivél munisípiu entende. Aban bainrua lei podér lokál mosu mai karik sira entende, nune’e fasil ba sira atu implementa maibé atu to’o iha ne’eba la’ós fasil maibé defisil,” nia informa.
Iha polítika no estratéjia Governu nian liuhosi polítika desentralizasaun iha meiu sira presiza atu ultra pasa, nune’e bele atinje podér lokál hanesan dezkonsentrasaun administrativa iha faze ida-ne’e dezempeñu munisípiu di’ak, iha oportunidade atu tama ba iha faze desentralizasaun instituisionál bele konsidera sai hanesan órgaun direta hosi Estadu.
Dezentralizasaun instituisionál bainhira iha faze dezkonsentrasaun munisípiu pasa, entaun tama faze desentralizasaun instutuisionál iha kompeténsia apropriadu ba sira bele jere rasik administrasaun patrimóniu iha direitu atu jere rasik no mós lojistika maibé tenke bazea ba diploma ministeriál konjunta no mós kontratu administrativu interorgániku (CAI).
Tanba, nia dehan, kompeténsia atu hatun mai tenke formula iha dokumentu hanesan diploma Ministeriál Konjuntu (DMK) no Kontratu Administrativu Interorgániku (CAI).
Ho nune’e, iha diploma ministeriál konjunta signifika temi ona kompeténsia iha dekretu-lei númeru 3/2006 kuandu kontratu formula iha KAI signifika sasán hirak ne’e la kaer iha dekretu-lei númeru 3 ho nia alterasaun sira, maibé iha nesesidade munisípiu atu halo.
Maske kompeténsia ne’ebé atu jere maibé tenke liuhosi eleisaun munisipál nune’e bele hetan reprezentasaun lokál mak bolu asembleia munisipál, prezidente no vise prezidente munisípiu sai hanesan pilar ba kada munisípiu ida-idak
Reprezentante Administradór Munisípiu Covalima, Afonso Nugueira Nahak, hateten autoridade nia prezensa ohin loron atu rona informasaun kona-ba lei podér lokál no lei eleisan munisipál.
“Ohin-loron ita atu rona no atu husu klarifikasaun la’ós atu hato’o sujestaun atu muda lei ne’e, esforsu ministru ho nia estrutura tomak sai ona lei tolu ho lei hirak ne’ebe ita iha atu lori ita ba dezentralizasaun administratriva,” nia dehan.
Tanba ne’e, nia mós husu ba administradór postu administrativu sira tenke partisipa ho másimu nune’e bele komprende didiak no lori dezentralizasaun ne’e ba oin.
Jornalista : Celestina Teles
Editór : Cancio Ximenes
