VIQUEQUE, 11 agostu 2022 (TATOLI)—Rejistu Sivil Viqueque rekolla taxa atendimentu no prosesu produsaun pasaporte hamutuk $3.200 iha jullu tinan ne’e.
“Ami enfrenta dezafiu hanesan rekusu limitadu hodi halo atendimentu ba komunidade ne’ebé trata sira-nia dokumentu no menus ekipamentu hanesan komputadór, nune’e kondisaun ne’e sai difikuldade ida ba ami, maibé nafatin halo atendementu ba ita-nia komunidade ne’ebé mai trata pasaporte,” Diretór Rejistu Sivil Viqueque, Aniceto Moreira, hateten iha ninia knaar fatin, Beloi, sesta ne’e.
Notísia relevante: Notariadu Bobonaro atende pasaporte 20 kada loron
Prosesu produsaun pasaporte hosi kategoria idade 0-12 hamutuk lima, idade 13-16 hamutuk ida, ho totál emitidu ida no kansela rua, nune’e hosi idade 17 ba leten kompostu hosi mane 209 no feto 57, ho totál emitidu 266.
Presu atu trata pasaporte iha rua mak hanesan $50 no $75, ne’ebé komunidade mai trata sira-nia pasaporte selu direta iha Banku Nasionál Komersiál Timor Leste (BNCTL, sigla prortugés).
“Kada loron Rejistu Sivil halo atendimentu trata pasaporte ba sidadaun tolu to’o lima,” nia akresenta.
Tuir dadus, funsionáriu iha Rejistu Sivil Viqueque hamutuk na’in-neen, kompostu hosi permanente tolu no kontratadu tolu.
Jornalista : Vitorino Lopes da Costa
Editora : Julia Chatarina
