DILI, 11 agostu 2022 (TATOLI)— Funsionáriu Banku Mandiri, kinta ne’e, hala’o doasaun raan ba Hospitál Nasionál Guido valadares hodi selebra aniversáriu ba dala-XIX iha ezisténsia iha Timor-Leste.
Biban ne’e, Embaixadór Indonézia iha Timor Leste, Okto Dorinus Manik, hateten funsionáriu Banku Mandiri ihaTimor Leste hala’o atividade doasaun raan ba Hospitál Nasionál Guido Valadares (HNGV) hodi ajuda fali ema seluk ne’ebé mak presiza raan.
“Iha selebrasaun aniversáriu ba dala-XIX ne’e, funsionáriu no parseiru Banku Mandiri hakarak halo doasaun raan hodi ajuda fali pasiente ne’ebé presiza raan. Ho atividade ne’e espera bele tulun maluk seluk ne’ebé presiza raan,” Embaixadór Indonézia ne’e informa iha Edifísiu Banku Mandiri-Colmera, kinta ne’e.
Daudaun ne’e, nia informa relasaun bilaterál Timor-Leste ho Indonézia mós halo ba tinan 20, nune’e selebrasaun aniversáriu Independénsia Indonézia iha loron 17 agostu tinan ne’e sei halo atividade balun iha KBRI, sábadu ne’e.
Iha fatin hanesan, Diretór Jerál Banku Mandiri iha Timor-Leste, Hari Sujiono, dehan atividade doasaun ne’e hanesan atividade ida hosi selebrasaun tinan ezisténsia Banku Mandiri nian ba dala-XIX iha Timor Leste.
“Ita sei halo asaaun karidade iha Cristo Rei no ita sei fahe esperénsia ba estudante sira iha munisípiu sira kona-ba bankária nian no ida ne’e hanesan meiu kontribuisaun ne’ebé iha ba Timor Leste. Doasaun raan ne’e ita iha terjetu atu atinje to’o plastiku raan (kantong darah) hamutuk 40,” nia afirma.
Entretantu, Xefe Departamentu Banku Sangue HNGV, Januario da Cruz Freitas, hato’o agradesementu ba Funsionáriu tomak no parseiru Banku Mandiri iha Timor-Leste hodi halo doasaun raan tanba raan turuk ida salva ema nia vida.
“Ita agradese tanba ita presiza raan duni no ho kontribuisaun ne’e bele fó tutan ba pasiente sira ne’ebé presiza raan iha ospitál laran,” nia agradese.
Hahú iha fulan juñu to’o jullu ema halo doasaun raan ba Banku Sangue HNGV hamutuk 798.
Jornalista : Felicidade Ximenes
Editór : Florencio Miranda Ximenes
