EDUKASAUN, HEADLINE

UNTL asina akordu ho MOP-BTL fasilita estudante halo estájiu iha infrastrutura

UNTL asina akordu ho MOP-BTL fasilita estudante halo estájiu iha infrastrutura

Edifísiu sentrál Univesidade Nasionál Timor-Lorosa'e. Imajen Tatoli/Francisco Sony

DILI, 11 agostu 2022 (TATOLI)—Universidade Nasionál Timor-Lorosa’e (UNTL) asina akordu kooperasaun ho Ministériu Obra Públika (MOP) no Bee Timor-Leste, Empreza Públika (BTL,E.P) hodi fasilita estudante sira halo estájiu iha área infrastrutura.

Reitór UNTL, João Soares Martins, konsidera akordu ne’e importante ba futuru instituisaun superiór ne’e.

“Ita iha interese boot tebes ho MOP no BTL hodi fasilita ita-nia estudante bele halo estájiu iha sira-nia fatin, tanba ami iha fakuldade enjeñaria siénsia teknolojia no siénsia ezata ne’ebé mak forma enjeñeiru sira iha área enjeñaria sivil, informátika, mekánika, jeolojia no mós forma graduadu ba siénsia pura iha fízika, matemátika no kímika,” Reitór hateten, iha sala vídeo konferénsia UNTL, kinta ne’e.

Notísia relevante: Instituisaun 13 prontu simu estudante 445 hala’o estájiu profisionál

Nia dehan, MOP hanesan parseiru importante tanba graduadu maioria hosi fakuldade rua ne’e aban bainrua barak mak sei bele serbisu iha ministériu no iha empreza iha área dezenvolvimentu infraestrutura.

Reitór iha esperansa, akordu ne’e bele fasilita estudante sira halo prátika iha instituisaun rua, nune’e UNTL bele promove ninia produtu teknolojia prátiku sira hamutuk ho parseiru sira.

Iha biban hanesan, Prezidente BTL, E.P, Carlos Peloi dos Reis, hateten, antes ne’e iha ona kooperasaun entre instituisaun maibé seidauk formaliza.

“Kooperasaun ne’e hodi fasilita ita-nia estudante sira hosi UNTL bele halo estájiu no peskiza iha BTL, ho intensaun fasilita sira bele hakle’an koñesimentu iha setór bee no saneamentu,” nia tenik.

Liuhosi kooperasaun ne’e, BTL, E.P aproveita sira-nia prezensa hodi rona hanoin oinsá elabora servisu di’ak liután iha futuru.

“Parte ida mak ita prepara jerasaun sira ba futuru no espera kooperasaun ne’e bele mellora servisu BTL,” Dirijente ne’e salienta.

Jornalista   : Arminda Fonseca

Editora        : Julia Chatarina

iklan
iklan

Leave a Reply

iklan
error: Content is protected !!