Alumni Parlamentu Foinsa’e-CCYC halo doasaun raan hodi selebra loron Internasionál Juventude
DILI, 12 agostu 2022 (TATOLI)— Komemora loron Internasionál ba Juventude, ne’ebé realiza iha loron 12 agostu ne’e, Organizasaun Juventude iha Timor-Leste hanesan Alumni Parlamentu Foinsa’e no Comoro Child Youth Center(CCYC), halo doasaun raan ba Hospitál Nasionál Guido Valadares(HNGV) atubele apoia ba paseinte sira ne’ebé mak presiza raan.
“Ho selebrasaun loron ne’e ami deside halo doasaun raan ho objetivu atu motiva joven sira bele iha espiritu voluntáriu hodi bele oferese ita nia raan turuk ida ba maluk sira ne’ebé mak presiza tebes ita nia tulun,” Koordenadór Comoro Child Youth Center (CCYC), Delio Mali Martins hateten ba jornalista sira iha SEJD-Lecidere, sesta ne’e.
Komemora loron internasionál juventude ne’e, dehan hamutuk ho Alumni Parlamentu Foinsa’e no organizasaun juventude sira seluk hala’o ona iha munisípiu Baucau hanesan sertame, diskursu públiku, semináriu, desportu no doasaun raan.
Iha fatin hanesan, Diretór Nasionál Asosiasaun Juventude iha SEJD, Jacinto António Ximenes, hateten, loron 12 fulan agostu sai loron mundiál ba juventude, nune’e juventude Timor-Leste hola parte ba ida ne’e hodi halo atividade oin-oin nomós halo doasaun raan hodi apoiu ba ema ne’ebé mak presiza raan.
“Tinan ida ne’e, Nasaun Unida deside tema ba loron internasionál juventude mak “interjerasionál” nune’e SEJD nia responabilidade ba área juventude nia mak realiza atividade iha munisípiu Baucau ne’ebé liga ho tema ne’e mak iha ita halo atividade sertame, diskursu públiku, semináriu, desportu no doasaun raan,” Diretór Nasionál ne’e akresenta.
Iha selebrasaun loron internasionál juventude ne’e, nia dehan Juventude Timor-Leste mós hetan dezafiu barak hanesan dezempregu maka’as no laiha fatin atu espresa sira nia kreatividade no talentu sira atu atinje sira nia mehi iha futuru
Jornalista : Felicidade Ximenes
Editór : Florencio Miranda Ximenes
