COVALIMA, EKONOMIA, POLÍTIKA

Asosiasaun Tane Konsimidór sensibiliza direitu konsumidór ba negósiante no konsumidór Covalima

Asosiasaun Tane Konsimidór sensibiliza direitu konsumidór ba negósiante no konsumidór Covalima

Negosiante no konsumidór iha Covalima rona informasaun hosi Asosiasaun Tane Konsumidor kona-ba direitu no dever negosiante no konsumidór bainhira sosa sasán. Imajen/Espesiál.

COVALIMA, 12 agostu 2022 (TATOLI)–Asosiasaun Tane Konsumidór realiza sensibilizasaun garante direitu no dever konsumidór ba negosiánte no konsumidór sira iha postu administrativu Suai, munisípiu Covalima.

“Ohin ami realiza sensibilizasaun informasaun garante direitu no dever konsumidór bazea protesaun konsumidór lei númeru 8/2016, 08 jullu, ne’ebé konsumidór nia direitu no dever ne’ebé konsagra ona iha lei,” Prezidente Asosiasaun Tane Konsumidór, António Ramos da Silva “Naikoli”, informa ba Agência Tatoli, iha Santa Rosa, sesta ne’e.

Problema atu garante direitu no dever konsumidór la’ós iha munisípiu Covalima de’it mak enfrenta maibé iha Timor laran tomak ne’ebé la asesu informasaun bainhira atu sosa sasán.

“Problema ne’ebé mak ita identifika la’ós iha Covalima de’it mak enfrenta, maibé iha Timor laran tomak konsimidór sira la asesu informasaun bainhira sosa sasán sira garantia ba produtu loja na’in fó mai, garantia fulan 1-3 ne’e la’ós signifika konsumidór sira la asesu informasaun kona-ba lei protesaun konsumidór,” nia informa.

Ho nune’e, Asosiasaun Tane Konsumidór realiza sosializasaun ba negosiánte, konsumidór ba autoridade liña ministeriál no autoridade lokál kona-ba sira-nia direitu no dever dala ruma ba konsumu sasán liu ona prazu mós la kestiona.

Konsumidór sira husu garantia sosa sasán iha loja sira la hatene garantia hanesan sosa telfone produtu la konsumivél iha lei konsumidór garantia tinan ida.

“Loja na’in sira la fó garantia ba ita-nia kompradór sira-nia direitu oinsá atu hatene informasaun no atuasaun autoridade produtu ne’ebé liu prazu, loja hamamuk armajen iha Dili faan iha Munisípiu ho folin baratu,” nia dehan.

Asosiasaun Tane Konsumidór sujere ba Autoridade Inspesaun no Fiskalizasaun Atividade Ekonómika, Sanitária no Alimentar (AIFAESA, I.P), kontrola labele iha de’it nasionál, maibé mós tenke mai munisípiu nune’e labele afeta ba konsumidór nia saúde tanba tenke proteje saúde seguransa no meiu ambiente.

Iha munisípiu potensiál tenke servisu hamutuk ho entidade fiskalizadora maiória iha Dili hanesan AIFAESA no IKTL iha Dili, entaun munisipiu tenke halo koordenasaun di’ak ho dirasaun komérsiu atu haree didi’ak loja na’in kumpre duni regulamentu ka lae, sira tenke haree regulasaun komérsiu ne’e ba protesaun konsumidór.

Tanba ne’e, Tane Konsumidór mós hato’o ona proposta ba munisípiu atu estabelese memorandu ho Tane Konsumidór hodi harii unidade protesaun Munisípiu, nune’e bele halo fiskalizasaun besik liu iha munisipiu.

Bazea ba konstiuisaun RDTL Artigu 53 (Direitu konsumidór sira-nian), iha alinea dahuluk hateten Konsumidór sira iha direitu atu simu sasán no servisu ne’ebé mak iha kualidade no mós atu hatene informasaun loos, kona-ba sasán sira-ne’e atu proteje sira-nia saúde, seguransa no mós interrese ekonómiku hanesan mós atu bele hadi’a buat ne’ebé aat.

Alinea daruak haktuir, lei maka regula publisidade, bandu publisidade hirak ne’ebé buka taka, hasees no habosok.

Jornalista : Celestina Teles

Editór      : Cancio Ximenes

iklan
iklan

Leave a Reply

iklan
error: Content is protected !!