DILI, 12 agostu 2022 (TATOLI)–Institutu Superiór Filozofia Teolojia (ISFIT) Dom Jaime Garcia Goulart Fatumeta entrega sertifikadu apresiasaun no bolsa estudu ba estudante na’in-40 resin ne’ebé hetan prestasaun di’ak inklui boxista, Delio Anzaqeci Mouzinho.
Boxista timor-oan ne’e sai segundu lugar iha finál boxe iha eventu Jogu Sudeste Aziátiku (SEA Games, sigla inglés) ba dala-31 tinan 2021, iha Vietname, foin lalais ne’e.
“Ami orgullu ba estudante Delio tanba nia estuda iha Filozofia, maibé bele kompete iha SEA Games internasionál no hetan segundu lugar iha boxe. Tanba ne’e maka ISFIT deside fó bolsu estudu ba nia hamutuk ho nia maluk estudante na’in-40 seluk ne’ebé hatudu mós prestasaun di’ak,” Vise-Reitór ne’ebé trata asuntu estudantíl no kooperasaun, Elídio Agostu Guterres, hateten iha kampus ISFIT, Fatumeta, sesta ne’e.
Notísia relevante: El-Matador kongratula boxista Delio okupa segundu lugar iha SEA Games
Estudante 40 resin hatudu ona sira-nia talentu di’ak hodi kompete ona eventu nível nasionál no internasionál, sei hetan mós sertifikadu apresiasaun inklui bolsa estudu, hanesan konsiderasaun ISFIT ba sira haree hosi susesu estudante nia atividade hotu hanesan debate sientífiku desportu ne’ebé iha boxe.
Sertifikadu apresiasaun ne’ebé ISFIT sei fó ba estudante sira hosi prestasaun ne’ebé estudante sira halo hahú hosi tinan 2019 to’o 2022, nu’udar sentidu rekoñesimentu instituisaun sei halo ba ninia estudante sira hodi motiva sira atu hametin no hasa’e liután kualidade internu no externu.
Iha sorin seluk, Boxista, Delio Anzaqeci Mouzinho, agradese ba ISFIT no husu orasaun hosi kolega sira inklui frater no amu sira iha instituisaun ne’e.
“Ha’u la husu buat ida ba sira iha momentu ne’ebá, maibé ha’u presiza de’it orasaun atu ha’u bele partisipa iha eventu ne’e ho di’ak. Nune’e, sira halo duni mai ha’u no ikus mai ha’u hetan rezultadu di’ak,” nia tenik.
Estudante semestre III fakuldade filozofia ne’e dehan, buat ne’ebé nia halo la’ós de’it ba nia-an maibé ba família, país no ISFIT.
“Ha’u agradese tanba ha’u-nia instituisaun hanoin ona hakarak fó sertifikadu apresiasaun no bolsa estudu ida ba ha’u, tanba durante ne’e ha’u hela ho amu ida, nia mak haree ha’u-nia eskola maibé ISFIT hakarak mós tulun, ha’u husu obrigadu barak,” nia agradese.
Daudaun ne’e Delio halo hela ninia preparasaun hafoin fila hosi Vietname, deskansa semana ida no kontinua treinu fali to’o agora tanba fulan ne’e nia sei dezloka fali ba joga iha Austrália.
Tuir oráriu, Delio sei joga iha Sidney iha loron 03 no Canberra iha loron 11 setembru.
Boxista ne’e dehan, nia sei ba jogu iha Austrália no sei halo esforsu hodi hetan rezultadu di’ak.
“Ha’u la promete, maibé ha’u sei hatudu forsa no sei oferese hotu ba rai doben Timor-Leste,” nia otimista.
Jornalista : Tomé Amado
Editora : Julia Chatarina
