BTL, E.P Covalima distribui “ficha stand meter” bee-moos ba komunidade
COVALIMA, 12 agostu 2022 (TATOLI)–Bee Timor-Leste, Empreza Públiku (BTL, E.P) Covalima, distribui ficha stand meter bee-moos ba komunidade iha suku Ogues, postu administrartivu Maucatar no suku Debos, postu administrativu Suai, munisípiu Covalima.
“BTL, E.P distribui ficha stand meter bee-moos no estiker ba kliente sira-ne’e ho objetivu ita atu hatene tuir totál kliente ne’ebé asesu bee-moos iha área urbana. Tanba BTL, E.P Covalima simu orientasaun Existénsia BTL, E.P hanesan negósiu tanba ne’e tenke konstribui reseita ba kofre Estadu,” Koordenadór BTL, E.P, Castro Dodi Ramos, informa ba Agência Tatoli, iha nia kna’ar fatin, Sukaer Laran, sesta ne’e.
Nune’e, iha fulan-agostu tinan ne’e BTL, E.P taka ona estiker no distribui ficha stand meter bee-moos, hafoin ne’e iha fulan-setembru tinan ne’e BTL, E.P sei aplika tarifáriu ba kliente sira.
Tabele tarifáriu vigora bazea ba dekretu-lei númeru 4/2004, 11 fevereiru 2004, kona-ba aprova rejime fahe ba públiku ho diploma ministeriál númeru 1/2004 kona-ba tabela tarifáriu.
Tabela tarifa bee-moos katak tabela ne’ebé hatudu tipu kliente bee-moos konsumu gastu no presu bee-moos ne’ebé konsimudór sei selu bee-moos ne’ebé uza liuhosi torneira.
Tabela tarifáriu bee-moos selu ba uza bee-moos ne’ebé hetan hosi sistema abastesimentu bee-moos ne’ebé Servisu Agua no Saniamentu (SAS) mak jere.
Tarifáriu abastesimentu bee-moos hala’o kobransa fulan-fulan hanesan tipu kliente uma hela konsumu to’o litru 14,00 metru kúbiku, tarifáriu kada litru $0,20 ho nune’e fulan ida selu $2,80 no bainhira uza bee-moos fulan ida ho volume bee-moos númeru 15 metru kúbiku $0,40 nune’e fulan ida sei selu $3,20 sentavu.
Maneira foti dadus uza bee-moos ne’ebé sei hatun pesoál SAS sei haree metru kontadór kada fulan atu bele lee no hakerek númeru kontadór bee nian ne’ebé monta ona iha kliente ida-idak nia uma no númeru bee ne’ebé hakerek ona mak sei uza hodi sura volume bee nian ne’ebé uza ona.
Jornalista : Celestina Teles
Editór : Cancio Ximenes
